Ko‘pchilik jannatmakon joyni qanday tasavvur qiladi? “Baunti” shokoladi reklamasidagi kabi bo‘lsa, ajabmas: oq qum, tiniq okean, palma daraxtlari va atrofda hech kim yo‘q. Oddiy odamlar erisha olmaydigan bunday orzular Gollivud yulduzlari uchun odatiy holdir.
Har tomondan suv bilan o‘ralgan yerni shovqin-surondan dam olish uchun eng yaxshi joy desa bo‘ladi. Quyida jahon yulduzlari bir vaqtlar egalik qilgan yoki egalik qilishda davom etayotgan qiziqarli orollar keltirilgan.
Marlon Brando: Taitidagi atoll
Afsonaviy amerikalik aktyor Marlon Brando o‘ziga orol sotib olgan aktyorlardan biri bo‘lgan. U 1966-yilda Taitidagi orolni 270 ming dollarga sotib olgan. Bugungi kunda u taxminan 2,5 million dollarga baholanmoqda.
Aktyor "Bauntidagi qo‘zg‘olon" filmidagi hamkasbi Tarita Teriipiyani sevib qoladi. Aktyor filmni suratga olish jarayoni o‘tgan orollarning go‘zalligidan hayratlanib, o‘ziga va sevgilisiga orollar sotib olgan.
Brando atoli kokos palmalari bilan qoplangan 13 ta kichik oroldan iborat. Eng katta orolda aktyor 12 ta uycha qurgan: ulardagi hamma narsa tabiiy materiallardan ishlangan. Vannnaxonadagi rakovinalar esa haqiqiy dengiz chig‘anoqlaridan yasalgan.
2004-yilda Brando vafotidan keyin uning merosxo‘rlari otalarining qarzlarini to‘lash uchun orollarni sotib yuborishgan. Orollarning yangi egasi Richard Beyli uychalarni hashamatli ekologik mehmonxonaga aylantirgan.
Bugungi kunda mehmonxona "Brando" deb nomlanadi va dunyodagi eng yaxshi ekokurortlardan biri hisoblanadi.
Devid Kopperfild: Musha-Key
Mashhur ko‘zboylog‘ich Devid Kopperfild 2006-yilda Bagamada 11 ta oroldan iborat arxipelagni sotib olgan. Xarid unga 50 million dollarga aylnagan.
Orollarni sotib olib, ularni asl holida qoldiradigan ko‘plab hamkasblaridan farqli o‘laroq, illyuzionchi o‘z orollarida bir nechta villalar qurgan. Orollardan birida Kopperfilding oilasi yashaydi, ba’zi villalarni ijaraga beradi.
Orollarda yashashni xohlaysizmi? Unda puliga rozi bo‘lsangiz bas. Orollarda bir kecha o‘tkazish 12 kishilik guruhga 37 ming dollarga, 24 kishilik guruhga esa 52 ming dollarga aylanadi. Orollarni eng kami to‘rt kechaga buyurtirish mumkin. Ixtiyoringizda villa emas, balki butun boshli orol bo‘ladi. Bundan tashqari, mehmonlar fitnes va raqs, yoga va massaj, kino, turfa xil yeguliklar, vindserfing va dengizga sho‘ng‘ishdan bahramand bo‘ladilar. Shuningdek, har qanday mijozning injiqliklariga moslashishga tayyor bo‘lgan mutaxassislar jamoasi xizmat ko‘rsatadi.
Kopperfild Musha Keyni nima uchun sotib olganini taxmin ham qila olmaysiz. Gap shundaki, fokuschi g‘ayrioddiy joylarga qiziqadi. U ayniqsa Pasxa orolini, Stounxenjni, Teotixuakandagi Quyosh piramidasini (Meksika) va Giza piramidalarini (Misr) yaxshi ko‘radi. U dastlabki ikki joyni, so‘ngra oxirgi ikki joyni tutashtiruvchi chiziqlar tortgach, bu chiziqlar kesishmasida Musha-Key yotganini aniqlaydi. Aynan shunda illyuzionchiga orollarni sotib olish fikri kelgan.
Mel Gibson: Mago oroli
Gollivud aktyori Mel Gibson 2005-yilda Fiji orollarida o‘ziga orol sotib oldi: axir, qaysi erkak buni istamaydi?
Aktyor sotib olgan Mago oroli Tinch okeanining janubi-g‘arbiy qismidagi eng katta xususiy orollardan biri bo‘lib, maydoni 22 kvadrat kilometrni tashkil etadi.
Aktyor orolni o‘zlashtirmay, uni asl shaklida qoldirishga qaror qildi. Orolda faqatgina samolyotlar uchun uchish-qo‘nish yo‘lagi bor.
Hozir orolda bir nechta qorovulgina istiqomat qiladi, biroq avval u yerda mahalliy aholi yashagan. Ularga tegishli eski uylar hanuzgacha saqlanib qolgan: bu yerda hovuzlar va parrandachilik fermasiga ega qishloq bo‘lgan.
Bundan tashqari, orolda dam olish va baliq ovlash uchun ideal joy – qumli ko‘rfaz mavjud.
Lenni Kravis: Erkin oroli
Xonanda Lenni Kravis o‘ziga Bagamadagi Elyutera arxipelagida kichik, ammo shinamgina orol sotib oldi. Aktyor uni injiqlik qilib emas, balki ajdodlari xotirasi hurmatiga xarid qilgan: Uning onasi tomonidan bobosi Bagama orollaridagi Inagua orolida tug‘ilgan va Kravis ushbu yerning tarixi hamda madaniyatiga qo‘shilish istagi haqida bir necha bor gapirgan, shu jumladan, bu haqda o‘z qo‘shiqlarida kuylagan.
Elyutera arxipelagining nomi yunoncha "erkin" so‘zidan kelib chiqqan. Xonanda butun pandemiyani o‘z orolida o‘tkazdi. Hozir ham u shovqin-surondan qochib, shu yerga tez-tez kelib turadi – bunday muhitda yangi qo‘shiqlar ham yaxshi yoziladi.
Selin Dion: hashamatli uyi bo‘lgan orol
Bu haqiqiy oilaviy orol. U yerda beshta uydan iborat ulkan ko‘chmas mulk va bolalar uchun akvapark ham bor. Kanadalik xonanda Selin Dion boshqalarning e’tiborini tortmaslik uchun o‘z farzandlarini har doim ham oddiy akvaparkga olib bora olmagan. Ko‘chmas mulkdagi havzalardan biriida gulxan atrofida shiringina suhbat qurib, dam olish uchun dumaloq shakldagi divan bor.
Uyning asosiy xonasidagi devorlarni qabullar va ziyofatlar o‘tkazish uchun yaxlit joy hosil qilish maqsadida olib tursa bo‘ladi. Uyda, shuningdek, videoo‘yinlar xonasi, ikkita oshxona, mehmonlar uchun apartamentlar va katta oilaviy xona mavjud.
Bundan tashqari, uyda muzqaymoq bari, golf simulyatori bo‘lgan tennis pavilyoni va massaj xonasi ham bor.
Aytgancha, xonandaning Kanadada yana bir oroli bo‘lgan, ammo yulduz uni sotib yuborgan.
Riki Martin: Riodan ikki soatlik masofada joylashgan orol
Mashhur Livin'la vida loca qo‘shig‘ining muallifi Riki Martin 2008-yilda Rio-de-Janeyro sohilbo‘yida, Angra-dus-Reys tumanida o‘ziga orol sotib olgan. Uning oroli braziliyalik taniqli shaxslar va yirik tadbirkorlarga tegishli boshqa o‘nlab xususiy orollar bilan o‘ralgan. Bu yerda ajoyib iqlim, go‘zal tabiat va ziyofatni sevuvchilar orasida ommalashgan mamlakatning eng mashhur shahri bor.
Martin shaxsiy hayotini begona ko‘zlardan himoyalashga harakat qiladi va o‘z oldiga paparatsilarni yo‘latmaydi. Shunisi ma’lumki, orolda to‘plar va hatto soqchi minoralari ham o‘rnatilgan, biroq ularning barchasi dekorativ maqsadlarda qilingan bo‘lishi kerak.
Frensis Ford Koppola: Beliz sohilidagi Koral-Key
Amerikalik mashhur rejissyor Beliz sohilidagi orolni yoqtirib qolgan. Orol kaliforniyalik advokat Terri Taoga tegishli bo‘lib, u orolni o‘n yil oldin sotib olgan.
“Cho‘qintirgan ota” filmining rejissyori so‘nggi olti yil davomida orolni o‘zi va oilasi uchun ijaraga olib keladi.
Bu juda ajoyib joy bo‘lib, begona ko‘zlardan marjonqoyalar bilan yashirilgan. Oroldagi ikkita kottej va dengizga manzaralar ochiluvchi asosiy uyda 10 nafargacha mehmonni sig‘dirsa bo‘ladi. Orolda marjon qumli plyaj va mangrov daraxtlari bor.
Rejissyorning qizi Sofiya Koppola o‘z intervyularidan birida oroldan bir necha soatlik masofada qadimgi Mayya piramidalari borligini, o‘rmonda esa yaguarlarni uchratish mumkinligini aytgan.
Bu haqiqiy ekokurort bo‘lib, unda barcha jihozlar quyosh energiyasida ishlaydi, suv o‘rnida esa yomg‘ir suvidan foydalaniladi.
2022-yil kuzida New York Post nashri orol sotuvga qo‘yilgani haqida xabar qilgan.
