Zaha Hadid Architects kompaniyasi Xitoyning Xaynan orolidagi Sanya shahridagi madaniy tuman loyihasi uchun tanlovda g‘olib chiqdi.
Gap milliondan ortiq odam yashaydigan Sanya shahri portiga kiraverishdagi 26,7 gektar maydon haqida bormoqda. Bu yerda madaniy muassasalardan tashqari, san’at markazi, ko‘rgazmalar zali, anjumanlar markazi va ko‘rgazmalar majmuasini qurish rejalashtirilgan. Loyiha shuningdek, turar-joy va ofislar, bog‘lar, maydonlar va sohilbo‘yi hududlarini qamrab oladi. Inshootlarning umumiy maydoni 409 ming kvadrat metrni tashkil qiladi.
Qurilish maydoni uni madaniy va tijoriy qismlarga ajratuvchi markaziy o‘q bilan bo‘lingan. Turli funksiyalarni bajaradigan asosiy binolar bir-biriga o‘xshash: ular fasad va terassalarni tropik quyosh hamda musson yomg‘irlaridan himoya qiluvchi soyabonli ko‘p qavatli tomlarga ega. Mualliflarning fikricha, tomlarning ko‘rinishi yelkanlarga yoki Sanya shahri joylashgan Xaynanning markaziy qismidagi tog‘larga o‘xshaydi.
Tomlarga quyosh panellari va yomg‘ir suvini yig‘ish tizimi o‘rnatiladi. Loyihada binolarning joylashuvi tabiiy yorug‘lik va shamollatishdan foydalanish uchun quyosh nurlarining tushish burchagi va shamolning ustun yo‘nalishlari hisobga olingan holda rejalashtirilgan. Binolarni sovutish uchun dengiz suvida ishlaydigan issiqlik almashgichlardan foydalaniladi.
