Britaniyaning Zaha Hadid Architects arxitektura studiyasi Saudiya Arabistonida barpo etilayotgan Neom shahridagi Trojena tog‘-chang‘i kurortining bir qismi sifatida 330 metr balandlikdagi osmono‘par bino loyihasini yaratdi. Osmono‘par binoning bosh rejasi Germaniyaning LAVA Architects studiyasi tomonidan ishlab chiqilmoqda.
Bino ko‘ngilochar majmuaning markaziy elementiga aylanadigan sun’iy ko‘lga qaraydigan asosiy chang‘i zonasi qarshisidagi tog‘da qad rostlaydi.
Osmono‘par binoning tasvirlarida yuqoriga qarab cho‘zilgan ko‘plab ustunlardan iborat kristallsimon konstruksiyani ko‘rish mumkin. U sohildagi inshoot bilan osma yo‘l orqali bog‘lanadi.
Binodan foydalanishning to‘liq tafsilotlari hali oshkor etilmagan bo‘lsa-da, unda do‘konlar, restoranlar, ko‘rgazma maydonlari, shuningdek, uch xil balandlikda joylashadigan tomosha maydonchalari bo‘ladi.
Saudiya Arabistoni qishki Osiyo o‘yinlarini cho‘l qo‘ynidagi Neom shahrida o‘tkazmoqchi. Osmono‘par bino Neomning e’lon qilingan to‘rtta hududidan biri bo‘lgan Trojena'ning bir qismi bo‘ladi.
Bosh rejaga ko‘ra, ushbu hudud tog‘-chang‘i sporti uchun qiyaliklar bilan qurshalgan bino, shuningdek, ko‘plab mehmonxonalar va boshqa diqqatga sazovor joylarni o‘z ichiga oladi. LAVA va Zaha Hadid Architects'dan tashqari, loyiha ustida boshqa studiyalar ham ish olib bormoqda.
2022-yilda e’lon qilingan loyihani 2029-yilda mintaqada o‘tkaziladigan qishki Osiyo o‘yinlarigacha to‘liq yakunlash rejalashtirilgan.
Saudiya Arabistonining shimoli-g‘arbiy qismidan joy oladigan Neom shahri loyihasi dunyodagi eng yirik loyihalardan biri hisoblanadi. Ushbu loyiha 170 kilometr uzunlikdagi “Chiziq” (The Line) deb nomlanadigan shahar qurilishini o‘z ichiga oladi. Biroq, bu shaharning yashashga yaroqliligi va barqarorligi tanqid qilinadi. Ulug‘vor yopiq inshootning balandligi 500 m, eni 200 m.ga yetadi. Shaharda 9 millionga yaqin odam doimiy yashashi mumkin bo‘ladi.
