IAA Architects arxitektura byurosi Amsterdamda 50 metrlik eski kranni hashamatli besh yulduzli mehmonxonaga aylantirdi. Mehmonxona bor-yo‘g‘i uchta xonaga ega va ularning barchasi lukslardir. Ulardan biri avval kran kabinasi bo‘lgan yerda, yana ikkita xona undan yuqorida va pastda joylashgan.
Mystique, Secret va Free Spirit deb nomlangan ushbu xonalarga oynavand liftda ko‘tarilish mumkin. Xonalar 35, 40 va 45 metr balandlikda joylashgan hamda barchasi ikki qavatli..
Shahar markazida joylashgan Faralda Crane Amsterdam deb nomlangan ushbu antiqa mehmonxonadan shaharga va Ij daryosiga go‘zal manzaralar ochiladi.
Bunday mehmonxonada bir kecha-kunduzni o‘tkazish 500 yevro atrofida turadi. Narxga spa-basseyn, yotoqqa keltiriladigan nonushta, qayiqda va vertolyotda sayr qilish ham kiradi.
Daryoga qaragan Free Spirit xonasi shinam vannaxona va tropik dush bilan jihozlangan. Unda «queen-size» o‘lchamli karavot va ikkita televizor mavjud.
Secret esa avval kran kabinasi bo‘lgan yerda joylashgan va hashamatli mebellarga ega.
Va nihoyat, Mystique xonasi qora va tilla ranglarda bezatilgan. Luksda isitiladigan spa-basseyn hamda hordiq hududiga ega ochiq ayvonga chiqish bor.
Ta’kidlanishicha, kran Niderlandiya portlarida ko‘p yillik xizmatdan so‘ng 2016-yilda qayta tiklangan.
