Yaponiyaning N-Ark kompaniyasi aholi, tibbiyot muassasalari, savdo markazlari va boshqalar joy oladigan ulkan suzuvchi shaharni qurish rejalarini oshkor qildi. Dogen City deb nomlanadigan shaharcha iqlim o‘zgarishi bilan bog‘liq dengiz sathi ko‘tarilishi va 40000 kishini elektr energiyasi, oziq-ovqat va suv bilan ta’minlashni hisobga olgan holda loyihalangan.
Shaharcha aylanasi 4 km bo‘lib, taxminan 10000 doimiy aholi va 30000 ga yaqin sayyohni sig‘dira oladi. Uning doira shakli og‘ir ob-havo sharoitlari va hatto sunamiga dosh beradigan qilib loyihalangan.
Loyiha uchta alohida qismga bo‘linadi:
asosiy yashash zonasini o‘z ichiga olgan asosiy halqa;
shaharni boshqarish va tibbiy tadqiqot markazlarini o‘z ichiga olgan suvosti ma’lumotlar markazi;
halqa shaklidagi struktura tomonidan hosil qilingan sun’iy ko‘rfaz ichida suzuvchi arxitektura.
Orolda ko‘plab yashil o‘simliklar, oziq-ovqat ishlab chiqarish korxonalari, maktablar, sport maydonchalari, shifoxonalar, bog‘lar, stadion, mehmonxonalar va ofislar bo‘ladi.
N-Ark hisob-kitoblariga ko‘ra, orolda yiliga 2 million litr suv iste’mol qilinadi va 3288 tonna chiqindi chiqariladi. Bundan tashqari, deyarli 7 ming tonna oziq-ovqat mahsulotlari va 22 million 265 ming kVt elektr energiyasi ishlab chiqariladi.
Bu ehtiyojlarning barchasini qondirish, albatta, ulkan vazifa bo‘ladi va shaharning render suratlarida ko‘plab quyosh panellari hamda oziq-ovqat ishlab chiqarish korxonalarini ko‘rish mumkin.
