STD Design Consultant kompaniyasi Vetnamdagi tor hududda Chic Vid House deb nomlangan turar-joy loyihasini amalga oshirdi. Ajablanarlisi, uyning eni atigi 3,9 metrni tashkil qiladi. Uy Xoshimin shahrining gavjum hududida joylashgan va bu loyiha kompaniya uchun haqiqiy chaqiriq bo‘ldi. Aytish joiz, kompaniya buning yechimini topdi va maydonda baland va ensiz uy yaratdi.
Binoning fasadi alohida e’tibor tortadi. Unda yon tomonga ochilib-yopiluvchi yog‘och jalyuzilar qo‘llanilgan. Jalyuzilar nafaqat dekorativ element, balki ventilyatsiyani boshqarish va quyosh nurining ichkariga kirishiga imkon beruvchi ajoyib yechimdir. Binoning o‘chimliklar bilan bezalgan balkonchalari ham unga o‘zgacha chiroy beradi. 
Chic Vid House'ning ichki qismiga kelsak, uyning barcha besh qavati rejasi puxta o‘ylangan va cheklangan maydon bilan uyg‘unlashgan. Ko‘zga yaqqol tashlanmaydigan rangdagi dekor qulaylik va osoyishtalik muhitini yaratadi. Binoning birinchi qavatida o‘yin maydoni, uning yonida esa oshxona bor. Oshxonadagi oynali eshiklar orqali boqqa chiqsa bo‘ladi.
Binoning yuqori qavatlarida yotoqxonalar, mehmonlar uchun xona va shaharga ajoyib manzaralar ochiluvchi ishchi xona bor. Uyning “toji” esa yuqori qavatidagi ochiq ayvondir.
Bugungi kunda shaharlarda ensiz uylar qurish dolzarb va talabgir tendensiyaga aylanmoqda. Vetnamdagi ushbu loyihadan tashqari, Londondagi Slim House va Xoshimindagi yana bir ensiz uy - Breathing House ham bunga yorqin misol hisoblanadi.
