Fransiyaning ayrim shaharlarida so‘nggi yillarda qayiqni o‘ziga uy qilib olgan odamlar soni ko‘payib bormoqda. Bu, asosan, ijara haqi va ko‘chmas mulk narxining oshishi bilan bog‘langan.
Bu tendensiya, ayniqsa, Charente-Maritime kabi sohilbo‘yi departamentlarida sezilarli bo‘lib, u yerdagi Roshfor marinasida turgan 300 ta qayiqdan 40 ga yaqini kim uchundir doimiy yashash joyiga aylangan.
Hudud boshqaruvchisi Ivan Puanoning Sud Ouest nashriga aytishicha, hozirda aholi besh yil oldingiga nisbatan deyarli ikki baravar ko‘paygan.
Roshfordagi qayiqlardan birida yashovchi Jan-Mishel Gatinoning ta’kidlashicha, shahar markazida kvadrat metri taxminan 2700 yevro turadigan ko‘chmas mulk bilan solishtirganda, bu yerda 5000 yevroga ancha arzonroq yashash joyi – eski qayiq topish mumkin.
Uning qo‘shimcha qilishicha, ayni vaqtda ijara haqi ko‘tarilgan va kam ta’minlanganlar markazdan uy topa olmayapti, chunki u juda qimmat. Pristanda qayiqda yashovchi Klod Xardi ham bu so‘zlarga qo‘shilishini aytgan.
"Shahar markazidagi eng kichik studiya-kvartirani kommunal xizmatlari bilan birga oyiga 600 yevroga ijaraga olish mumkin", – deydi u. — Portda esa men turargoh uchun oyiga 250 yevro va elektr uchun 30 yevro to‘layman, xalos. 860 yevrolik kichik pensiyamni hisobga olsak, bu men uchun mushkullik tug‘dirmaydi”.
Raqamlar jalb qiluvchidek tuyulishi mumkin bo‘lsa-da, Ivan Puano qayiqdagi hayot uy-joy inqirozini osonlikcha hal qilmasligini aytgan.
Qayiqni sohilga qo‘yish uchun to‘lov miqdori, odatda, kema uzunligiga bog‘liq bo‘ladi va bu borada ham narxlar oshmoqda. Misol uchun, Roshfor marinasida o‘rtacha kattalikdagi 10 metrli qayiqni qo‘yish uchun yillik to‘lov qiymati 2019-yildan 2023-yilgacha oraliqda 100 yevroga oshgan.
Natijada, eng past narxlarni to‘lash uchun iloji boricha kichikroq qayiqqa suqilishga to‘g‘ri keladi.
"So‘nggi yillarda men uzunligi 6 metr bo‘lgan yelkanli qayiqlarda yashovchi odamlarni ko‘rdim, bu 7 kvadrat metrlik qayiqqa tengdir va bunday uy-joy juda ishonchsiz", deb o‘z so‘zlarini nihoyalagan Puano.
