Fransiyada tarixiy qamoqxona mehmonxonaga aylantirildi
Fransiyaning A+Architecture byurosi Fransiya janubidagi qadimiy Bezye shahridagi tarixiy qamoqxonani rekonstruksiya qildi. Qamoqxona kameralari o‘rniga kichik, ammo qulay mehmonxona xonalari paydo bo‘ldi. Shu bilan birga, ular o‘ziga xos muhitni saqlab qoldi.
Qamoqxona binosi 1850-yillarda shaharning barcha tomosha joylaridan yaxshi ko‘rinadigan joyda, monpelyelik me’mor Pyer-Charlz Abrikning loyihasi bo‘yicha qurilgan. 19-asr oxiriga kelib qamoqxonani kengaytirishga to‘g‘ri kelgan, 100 ga yaqin mahbusga mo‘ljallangan qamoqxonada ba’zida ular soni 300 gacha yetgan. 2009-yilda qamoqxona yangi binoga ko‘chirilgan.
Shahar landshaftidagi asosiy o‘rinlardan birini egallagan qamoqxona binosining keyingi taqdiri 2019-yilgacha mavhum bo‘lib qolgan. So‘ngra, eng noodatiy joylarni mehmonxona va restoranlar sifatida rivojlantirishga qaror qilgan yosh ixlosmandlar jamoasi tashabbusi bilan sobiq qamoqxona barcha zarur infratuzilmaga ega 50 xonadan iborat shinam uch yulduzli mehmonxonaga aylana boshlagan.
Qamoqxonani rekonstruksiya qilish loyihasi muallifi A+Architecture byurosi bo‘ldi. Me’morlar tarixiy binoning tashqi ko‘rinishini to‘liq saqlab qolgan holda, faqat ichini o‘zgartirganlar.
Loyihaning eng qiziqarli joyi majmuaning eng pastki qismida joylashgan terrasali restoran hisoblanadi. Bundan tashqari, mehmonxonada ochiq basseyn, uchta majlislar zali, kichik kutubxona, sport zali va do‘kon mavjud. 
