Tez, arzon, texnologik ilg‘or - Yaponiya kompaniyasi 3D-printer yordamida arzon uylar bosish yo‘lini ishlab chiqdi. Bu texnologiya yordamida 2 kun ichida uy barpo etish mumkin!
3D-texnologiya rivojlanishining ilk davridayoq "bosma" uylar va obyektlar an’anaviy usuldagi qurilishning arzon muqobili bo‘lishi taxmin qilingan edi. Ammo o‘n yildan ko‘proq vaqt o‘tgan bo‘lsa-da, hanuzgacha arzon 3D-binolar paydo bo‘lmadi, ularning eng arzoni esa AQSHda 450000 dollardan qurilgan.
Biroq Yaponiyaning Serendix startapi haqiqatan ham arzon, ixcham uylarni chop etishni yo‘lga qo‘ydi. Kompaniya 5,5 million iyen (37 000 dollar) turadigan, 3D-printerda bosilgan birinchi loyihasini topshirishga muvaffaq bo‘ldi. 50 kvadrat metr maydonga ega, ikki xonali kvartira hajmidagi kichik uylar juda tez – bor-yo‘g‘i 2 kunda quriladi. Shu tariqa, yosh juftliklar, kompaniya ta’kidlayotganidek, “mashina narxiga sotib olish” mumkin bo‘lgan o‘z uylariga ega bo‘lishlari mumkin.
Bir qavatli "chig‘anoq-uy" loyihasi me’morlar Emu Masuyama va muhandis Xiroya Tanaka tomonidan ishlab chiqilgan. Birinchi model 3D-printerda qismlab bosilib, so‘ngra bevosita qurilish maydonida yig‘ilgan. Kompaniyaning ta’kidlashicha, qurilish jarayoni atigi 44 soat 30 daqiqa davom etgan. Uyning tomi printerda bosilmagan, u stanokda kesilgan yog‘och karkasdan va qurilish fanerasidan yasalgan qoplamadan yig‘ilgan. Oxirida esa uyning deraza va eshiklari o‘rnatilgan.
Uyning ichida bitta yotoqxona, oshxonaga ega umumiy xona va vannaxona bor. Uy bir yoki ikki kishi yashashi uchun juda mos keladi. Arxitektorlarning ta’kidlashicha, bino mustahkam konstruksiyaga ega, yong‘in va namlikka chidamli hamda yaxshi izolyatsiyani ta’minlaydi.
Ta’kidlanishicha, Yaponiyada bundan arzonroq uy topib bo‘lmaydi. “Biz yaponlarning 40 foizi butun umri davomida uy-joyga ega bo‘la olmaydigan 30 yillik ipoteka kreditlarining joriy siklini tugatishni istadik”, deb o‘z maqsadi bilan bo‘lishgan kompaniya. Shunday ekan, kompaniya birinchi oyda "bosma" uylar uchun 3000 ta buyurtma olganiga ajablanmasa ham bo‘ladi.
