Turkiyaning Chanaqqal’a (Dardanela) bo‘g‘ozi yaqinida IND [Inter.National.Design] byurosi va Powerhouse Company tomonidan loyihalashtirilgan teleminora foydalanishga topshirildi. U nafaqat texnik, balki jamoat inshooti sifatida ham loyihalangan.
Minora Egey va Marmara dengizlari orasidagi bo‘g‘oz sohilida, Chanaqqal’a shahri yaqinidagi Radar tepaligida joylashgan. Balandligi 300 m.dan ortiq bo‘lgan bu o‘rmonli tepalikni uzoq vaqt davomida turli xil telekommunikatsiya minoralari egallab turgan. Bu esa nafaqat hudud ko‘rinishini, balki uning hordiq chiqarish joyi sifatidagi imkoniyatlarini yo‘qqa chiqargan: tepalikdan bo‘g‘ozni tomosha qilishning iloji yo‘q edi, chunki г texnik obyekt sifatida tashrif uchun yopiq bo‘lgan.
Turkiya hukumati ushbu muammoni hal qilish uchun 2013-2014-yillarda xalqaro tanlov o‘tkazdi. Tanlovda qo‘yilgan vazifa landshaft ko‘rinishini buzmasdan, jamoat funksiyasiga ega teleminorani loyihalash bo‘lgan. Niderlandiyaning IND byurosi va Powerhouse Company tanlovda yutib chiqqan.
Ular taklif qilgan loyiha yerdan ko‘tarilgan "sirtmoq" ko‘rinishida bo‘lib, uning oxiri yuqoriga ko‘tarilib, balandligi 100 metrlik televizion minorani tashkil qiladi. Atrofdagi manzaralarni “sirtmoq”qa o‘rnatilgan hamda bo‘g‘ozga qaragan tashrif buyuruvchilar markazidan va uning usti uzra o‘tkazilgan yurish yo‘lagidan tomosha qilish mumkin.
Teleminora tashrif buyuruvchilar uzatgichlar nurlanishidan ziyon ko‘rmasliklari uchun “sirtmoq”ning omma uchun mo‘ljallangan qismi qarshisida joylashtirilgan. U po‘lat modullardan, shu jumladan 40 mm qalinlikdagi listlardan barpo etilgan. Inshoot qoplamasi uchun korten po‘lati tanlangan, bu material atrofdagi qarag‘ay daraxtlariga nafaqat tuzilishi va rangi bo‘yicha mos keladi, balki shamol va yomg‘irlarga ham yaxshi dosh bera oladi. Minora 44,5 m/s gacha tezlikda esuvchi shamollarga mo‘ljallangan.
