Yaponiyadagi yangi eng baland bino qurib bitkazildi. Bu serjilo bino Tokio markazida bir necha yillardan beri qurib kelingan katta ko‘lamli “zamonaviy shahar qishlog‘i”ning bir qismi hisoblanadi.
Yumaloqlangan qirralarga ega Azabudai Hills Mori JP Tower binosi balandligi 330 metrga yetadi, u 64 ta yerusti va 5 ta yerosti qavatidan iborat. Bino bungacha Yaponiyadagi eng baland hisoblangan – Osakadagi 300 metrlik Abeno Harukas osmono‘par binosidan oshib ketdi.
Minora qurilishining yakunlanishi katta ko‘lamli Azabudai Hills majmuasini sentabrda rejalashtirilgan ochilishiga yanada yaqinlashtirdi. Binoni qurgan Mori Building Co kompaniyasining bayonotiga ko‘ra, loyiha 2019-yildan beri amalga oshirib kelinmoqda va yaqin kunlarda unga oxirgi “shtrix”larni kiritishgina qoldi.
Yangi bino ko‘p funksiyali bo‘ladi: undan qarorgohlar, ofis xonalari, universitet tibbiyot markazi, do‘konlar va restoranlar hamda Tokio markazidagi eng yirik xalqaro maktab joy oladi.
8 gektardan ortiq maydonni egallagan loyiha butun hududni, jumladan, spa-markaz, fitnes klublar, badiiy galereya va muzeyni o‘z ichiga olgan boshqa obyektlarni jonlantirishga qaratilgan.
"Hududda transport harakatini ta’minlash uchun biz hatto majmuadan o‘tuvchi yangi yo‘llar qurdik", deb ma’lum qilingan kompaniya veb-saytida. Majmua 20000 ga yaqin xodim va 3500 aholini qamrab olishi kutilmoqda, unga har yil 25-35 million kishi tashrif buyurishi kutilmoqda.
Bino AQSHning taniqli Pelli Clarke & Partners arxitektura firmasi tomonidan loyihalashtirilgan.
Tez orada yangi binoning raqobatchilari paydo bo‘ladi: Tokioda mash’alalardan ilhomlanib quriladigan yangi bino quriladi. Balandligi 390 metr bo‘ladigan mash’ala-minora 2027-yilda qurib bitkazilgach, Azabuday tepaliklari ustida qad rostlaydi.
Yaponiya bir vaqtlar o‘zining texnologik taraqqiyoti va jadal sur’atlardagi shahar rivojlanishi bilan mashhur bo‘lgan, garchi uning eng baland osmono‘par binolari hozirgi asr boshigacha qadar qurilgan. Bu orada, boshqa davlatlar oldinlab ketib, yanada balandroq binolar qurmoqda - Azabudai Hills Mori JP Tower Nyu-York, Tayvan va Dubaydagi binolardan ancha ortda qoladi.
Tokio dunyodagi aholi soni eng ko‘p shaharlardan biri bo‘lib, uning geografik va iqlimiy xususiyatlari, masalan, cheklangan hudud va tez-tez zilzila yuz berishini hisobga olgan holda, osmono‘par binolarni qurish alohida yondashuvni talab qiladi. Eng asosiysi, Tokiodagi osmono‘par binolar nafaqat funksional va estetik jihatdan jozibador, balki maksimal xavfsiz bo‘lishi kerak. Bu esa seysmik izolyatsiya va qurilishning eng yangi texnologiyalaridan foydalanishni nazarda tutadi.
