Shvetsiya poytaxti Stokgolmda yog‘ochdan barpo etiladigan dunyodagi eng yirik shaharsozlik loyihasi - Stockholm Wood City paydo bo‘ladi. 250 ming kvadrat metrdan ortiq maydonda 7 mingta ofis xonasi va 2 mingta uy, shuningdek, restoranlar va do‘konlar joylashadi. Loyiha qiymati 1,4 milliard dollarga baholanmoqda.
Shaharcha loyihasi White Arkitekter va Henning Larsen arxitektura kompaniyalari tomonidan ishlab chiqilgan. Qurilish 2025-yilda boshlanib, 10 yil ichida yakunlanishi rejalashtirilgan.
Yog‘ochdan inshootlar qurish an’anaviy materiallarga qaraganda sezilarli darajada kamroq uglerod chiqindilarini hosil qilishi aniqlangan. Biroq, u yangi xavflarni ham keltirib chiqaradi.
Bunday xavflardan eng kattasi yong‘in xavfsizligi bilan bog‘liq.
Qurilish sanoati hissasiga dunyo bo‘yicha barcha chiqindilarning deyarli 40% to‘g‘ri keladi. Shu sababli, yirik o‘lchamli yog‘och ekologik tozaroq variant deb qabul qilinadi.
Tadqiqotlar shuni ko‘rsatdiki, agar o‘rta qavatli binolarda po‘lat va beton o‘rniga yirik yog‘och ishlatilsa, bu qurilish materiallarini ishlab chiqarish, ularni tashish va o‘rnatish bilan bog‘liq chiqindilarni 26,5% ga kamaytirishi mumkin.
Biroq, ba’zi tadqiqotchilar katta o‘lchamli yog‘ochli binolarning uglerod ta’siri haqida to‘liq ma’lumot yo‘qligini ta’kidlaydilar. Ularning aytishicha, yirik yog‘ochni ishlab chiqarish jarayoni taxmin qilingandan ko‘ra ko‘proq chiqindilar hosil qilishi mumkin.
Atrium Ljungberg bosh direktori Annika Anasning aytishicha, Stockholm Wood City "barcha qolgan obyektlar kabi yuqori xavfsizlik talablariga", shu jumladan, yong‘in xavfsizligiga to‘liq javob beradi.
Uning ta’kidlashicha, shaharchani qurishda ishlatiladigangan yog‘och "aynan shu maqsadda maxsus yaratilgan". Maxsus yog‘och o‘z sirtida o‘tga chidamli qatlam hosil qiladi va bu undan barpo etiladigan konstruksiyani xavfsiz qiladi.
Anasning so‘zlariga ko‘ra, bunday ekologik toza loyihalarga namunalar ko‘proq kerak, shunda ularning soni dunyoda ko‘proq bo‘ladi.
