Seul hukumati dunyodagi eng katta tirgaklarsiz tomosha g‘ildiragi “Seul halqasi”ni qurish rejasini e’lon qildi. Ulkan metall halqa balandligi 180 m.ga yetadi va tashrif buyuruvchilarga go‘zal manzaralarni taqdim etadi.
“Seul halqasi”, shuningdek, dunyodagi ikkinchi eng katta tomosha g‘ildiragi bo‘ladi. Hozirda bu borada yetakchi o‘rinni Birlashgan Arab Amirliklaridagi Ain Dubai g‘ildiragi egallamoqda, uning balandligi 250 m.ga yetadi.
Attraksion ishga tushirilgandan so‘ng, soatiga taxminan 1470 odamni qabul qiladi, bu kuniga taxminan 11790 odam deganidir. Tomosha g‘ildiragini harakatlantirish uchun energiya qisman qayta tiklanuvchi energiya manbalaridan olinadi.
“Seul halqasi” Xanil bog‘idagi Nodil sun’iy orolida quriladi. Bu orol dastlab chiqindixona sifatida ishlatilgan, ammo u tozalanib, mahalliy diqqatga sazovor joyga aylantirilgan. Tashrif buyuruvchilar attraksionga yetib borishida haydovchisiz elektr avtobuslarni yo‘lga qo‘yish rejalashtirilgan. Bundan tashqari, osma yo‘l tizimini barpo etish rejasi ko‘rib chiqilmoqda.
Eng qiziqarlisi, “Seul halqasi”da an’anaviy tirgakli tomosha g‘ildiragi dizaynidan voz kechilib, tirgaksiz ko‘rinishda yaratish uchun innovatsion texnologiyalardan foydalaniladi. Attraksionning qurilishi 2025-yilda boshlanishi, 2027-yil oxirida esa yakunlanishi rejalashtirilgan.
