Rossiyaning «CLT development» kompaniyasi Rossiyaning markazi va janubida to‘liq yog‘ochdan quriladigan mini-mehmonxonalar tarmog‘ini barpo etadi. Hammasi bo‘lib 30 tagacha mehmonxona quriladi va tarmoq Cosmos Hotel Group deb nomlanadi. Bu haqda “Vedomosti” xabar berdi.
Qurilish ishlari shu yil boshlanishi rejalashtirilgan. Mehmonxonalar “Oltin halqa”ga hamda Markaziy va Janubiy federal okruglar tarkibiga kiruvchi shaharlarda joylashtiriladi. Kompaniya hozircha mehmonxonalar qaysi shaharlarda qurilishini sir tutmoqda.
Mehmonxonaning devorlari va pollari CLT panellardan yasaladi. Bu panellar temir-betondan emas, balki bo‘ylama va ko‘ndalang yopishtirilgan yog‘och qatlamlardan tayyorlanadi.
Barcha mehmonxonalar bir-biriga o‘xshash bo‘ladi. Ular o‘zidan 1477 m² maydonga ega uch qavatli yog‘och binolarni aks ettiradi. Bitta mehmonxonada 52 ta xona bo‘ladi. Ekomehmonxonalar ichida resepshn, bar, kechki dam olish uchun lobbi, yegulik va ichimliklar sotuvchi avtomatlar bilan jihozlangan nonushta hududi bo‘ladi.
Mehmonxonalarda elektr transport vositalari uchun stansiyalar, sport maydonchasi, park va hatto uy hayvonlarini sayr qildirish uchun alohida maydon ham taqdim etiladi.
Kompaniya ma’lumotlariga ko‘ra, yog‘och binolarni qurish o‘ta tez jarayondir. Ta’kidlanishicha, bitta mehmonxonaning qurilishi 11 oydan oshmaydi. Shuningdek, yog‘och mehmonxonalar katta hajmdagi sarmoyalarni talab qilmaydi. Bitta mehmonxonani qurish narxi 300 million rublni tashkil qiladi va butun tarmoqqa taxminan 9 milliard rubl sarflanadi.
