Londondagi yangi piyodalar ko‘prigi odamlarni nafaqat daryoning bir qirg‘og‘idan boshqasiga olib o‘tishning eng oson usuli, balki eng kreativlaridan biri bo‘ldi. Gap shundaki, noyob ko‘prik qayiqlar uning ostidan bemalol o‘tishi uchun “umbaloq oshishi” mumkin.
Cody Dock Rolling Bridge deb nomlangan ko‘prik loyihasi Londondagi eski sanoat dokini rekonstruksiya qilish doirasida amalga oshirilgan.
Rekonstruksiya doirasida prichalni qayta ochishga qaror qilindi, bu esa o‘z navbatida maydondagi eski to‘g‘onni demontaj qilishni va yangi piyodalar ko‘prigini qurishni talab qildi. Dokni ta’mirlashga mas’ul bo‘lgan Gasworks Dock Partnership kompaniyasidan Saymon Mayers dastlab an’anaviy ajrab-yig‘iluvchi ko‘prikni o‘rnatishni rejalashtirgan. Biroq, me’mor Tomas Rendall-Peyj bu rejalardan xabar topgach, Mayersga murojaat qilgan va muhandis Tim Lukas ko‘magida noodatiy aylanuvchi ko‘prik qurish taklifini ilgari surgan.
Antiqa ko‘prik quyidagicha ishlaydi: ko‘prikning oddiy holatida velosipedchilar va piyodalar undan oddiy ko‘prikdan o‘tgandek o‘tishadi. Biroq, uning ostidan qayiq o‘tishi kerak bo‘lganda, ko‘prikning oxirlariga o‘rnatilgan po‘lat tishlar har ikki qirg‘oqdagi beton devorlarga o‘rnatilgan bir juft yo‘lak ustidan “umbaloq oshishga” imkon beradi. Buning natijasida qayiqlar o‘tishi uchun yetarlicha bo‘shliq hosil bo‘ladi. Butun jarayon taxminan 20 daqiqa vaqt oladi.
Ko‘prikda metall va beton ballast mavjud bo‘lib, u pastki qismning og‘irligiga qarshi turadi va ko‘prik butunlay teskari holatga kelgunga qadar to‘liq 180 daraja aylanish imkonini beradi. Hayratlanarli tomoni shundaki, ko‘prik shu qadar sinchkovlik bilan loyihalanganki, uni harakatlantirish uchun dvigatel yoki elektr quvvati talab etilmaydi. Buning o‘rniga, u qo‘l lebedkalari yordamida harakatga keltiriladi.
