Xitoyning Open Architecture studiyasi Xitoyning Yantay shahrida qad rostlaydigan koinot muzeyi va tajriba markazi loyihasini taqdim etdi. Muzey okean bo‘yidagi bog‘da joylashadigan sirli qora obyekt ko‘rinishida bo‘ladi.
“Koinot kristallari” nomini olgan bino yaltiroq qora fasadga va bir uchi okean tomon yo‘nalgan qirrali ulkan tosh shaklida bo‘ladi.
Open Architecture loyihani “istirohat bog‘i maydoniga sirli ravishda qo‘ngan o‘zga sayyora obyekti” deb ta’riflagan.
Orqa tomonidan bo‘yalgan oynalar tashqi fasadning yarmini, fotoelektrik oynalar esa janubiy fasadni qoplaydi va binoni yoritish uchun yetarlicha quyosh energiyasi ishlab chiqaradi.
Bino o‘rmonzordagi ochiq maydonda joylashadi.
Ishlab chiqaruvchining hisob-kitoblariga ko‘ra, taxminan 2520 kvadrat metr maydonni egallagan fotoelektrik oynalar ishlab chiqaradigan elektr energiyasi 77 kilovattni tashkil qiladi. Bu quvvat quyoshli havoda butun binoni yoritish uchun yetarli bo‘ladi.
Mehmonlar binoga janub tomondan kirishadi va ularni binoning tashqi ko‘rinishini takrorlovchi qirrali devorlarga ega 20 metr balandlikdagi atrium qarshi oladi.
Atrium ko‘rgazma maydoni sifatida ishlatiladi, unda osilgan obyektlar va raqamli proyeksiyalar taqdim etiladi. Binoning yuqori qavatida ochiq terassa bo‘ladi. Yon tomondagi kirish eshigi muzey yopiq bo‘lganda bino ichidagi teatr va kafega kirish imkonini beradi.
Open Architecture odamlarni fazo va koinot haqida ko‘proq bilishga taklif qiluvchi muzey yaratishga intilgan.
Ta’kidlanishicha, Yantay shahri ochiq fazoga chiqqan birinchi xitoylik ayolning tug‘ilgan yeri hisoblanib, mahalliy aholi bundan juda g‘ururlanadi.
2026-yilda yakunlanishi rejalashtirilayotgan Space Crystals loyihasi Open Architecture'ning sohilbo‘yi bog‘i uchun mo‘ljallangan yirikroq rejasining bir qismi hisoblanadi. Ushbu maydonda yana dengiz maydoni, kutubxona va iskala ustida kvadrat shaklidagi jamoat binosi barpo etish maqsad qilingan.
“Ikki bino fazo va vaqtda muloqotni hosil qiladi: biri osmonga, ikkinchisi dengizga ishora qilib, hozir, o‘tmish va kelajakni bog‘laydi”, deb aytilgan studiyada.
