Saudiya Arabistoni Jidda shahrida qad rostlaydigan va balandligi 1000 metrdan oshadigan, dunyoning bo‘lg‘usi eng baland binosi – The Jeddah Tower qurilishi qayta yo‘lga qo‘yilganini e’lon qildi. Loyihani amalga oshirish bilan Jeddah Economic Company (JEC) shug‘ullanmoqda.
Kompaniya allaqachon tender jarayonini boshlab yuborgan va yil oxirigacha qurilish uchun pudratchilarni tanlab oladi. Jidda minorasi ayni damda dunyodagi eng baland bino – Dubaydagi Burj Halifa osmono‘par binosidan 172 metr balandroq bo‘lishi kutilmoqda.
Bundan tashqari, u yangi biznes tumani - Jiddaning iqtisodiy shahri markaziga aylanadi. Minoradan 2 tadan 6 tagacha yotoqxonaga ega bo‘ladigan turli o‘lchamdagi kvartiralar, shuningdek, hashamatli butiklar, restoranlar, tennis kortlari va boshqa ko‘plab obyektlar joy oladi.
Shuningdek, osmono‘par bino dunyodagi eng baland tomosha maydonchasiga ham ega bo‘ladi. Bundan tashqari, binoning bir qismini hashamatli Four Seasons mehmonxonasi egallashi mumkin.
Avval xabar qilinganidek, 2024-yil aprel oyida Dubayda Dubai Creek Tower megaloyihasining yangi konsepsiyasi taqdim etiladi. Ushbu inshoot dunyodagi eng baland bino va dunyoning yangi mo‘jizalaridan biriga aylanadi.
Dubai Creek tumanida qad rostlaydigan osmono‘par bino qurilishi 2024-yil avgustida boshlanishi mumkin. U Dubay amirligining yangi me’moriy mo‘jizasiga aylanishi kerak.
Eslatib o‘tamiz, Dubai Creek Tower qurilishi 2020-yilda to‘xtatib qo‘yilgan edi. Dastlab 1300 metrlik osmono‘par bino qurish rejalashtirilgan edi. Ammo yaqinda ma’lum qilinganidek, loyiha hozirda qayta ishlanmoqda.
