Buyuk Britaniya hukumati parlamentning barcha binolari konstruksiyalarida bino qulashiga olib kelishi mumkin bo‘lgan muayyan turdagi beton bor-yo‘qligini tekshirishni boshladi. Bu haqda Times gazetasi xabar berdi.
Avvalroq o‘quv yili boshlanishiga bir necha kun qolganda Angliyadagi 100 dan ortiq maktabni qulash xavfi sababli yopish yoki qisman yopishga buyruq berilgan. Angliya sog‘liqni saqlash xizmati ham shu sabab bilan barcha kasalxonalarning holatini zudlik bilan ko‘zdan kechirishni so‘ragan.
Gazetaning yozishicha, parlamentning “eng mashhur qismlari” 19-asrdagi yong‘indan so‘ng qayta qurilgan. Biroq o‘shandan beri parlament binolari ko‘paygan, ayrim binolarga jiddiy o‘zgartirishlar kiritilgan. Shu sababli, ularning konstruksiyalarida xavfli qurilish materiali bo‘lishi mumkinligidan xavotir bor.
Bu xavotirlar tekshirilayotgan binolar qurilishida avtoklavlangan gazbeton qo‘llangani bilan bog‘langan. Bunday beton Britaniyada 1950–1990-yillarda bir va ikki qavatli jamoat binolarini qurishda ko‘p ishlatilgan. Material odatiy betonga o‘xshaydi, ammo undan yengilroq, xizmat qilish muddati qisqaroq va namlikdan buzilishga ko‘proq moyil.
Avvalroq Britaniya parlamenti joylashgan Vestminster saroyi xavfsizlik va binoning qulashi bilan bog‘liq xatarlar ortib borayotgani sababli zudlik bilan restavratsiya qilinishi kerakligi ma’lum qilingan. Inshootni ta’mirlash dasturi 22 milliard funtga baholanmoqda va bu jarayon 76 yilgacha davom etishi mumkin. Hozirda binoni saqlash uchun haftasiga ikki million funt sterlingga yaqin pul, yiliga esa 100 million funt sterling sarflanadi.
