Bugungi yuqori texnologik muhitda tobora ko‘proq quyosh energiyasi tizimlari quyosh ortidan kuzatish, unumdorlikni nazorat qilish, masofadan boshqarish va boshqa “aqlli” funksiyalar bilan jihozlanmoqda.
Quyida turli ishlab chiqaruvchilarning “aqlli” quyosh energiyasi tizimlari haqida qisqacha ma’lumot keltirilgan.
SunPower quyosh energiyasi tizimi
SunPower korporatsiyasining dizayn studiyasi foydalanuvchilarga sun’iy yo‘ldosh tasvirlari yordamida o‘z quyosh energiyasi tizimlarini onlayn sozlash va ularni uy tomida joylashtirganda qanday ko‘rinishda bo‘lishini oldindan ko‘rish imkonini beradi. Kompaniyaning SunVault energiya saqlash tizimi kunduzi quyosh panellari yordamida yig‘ilgan energiyani saqlaydi. Uni maxsus dastur yordamida osongina boshqarish mumkin. Bu esa foydalanuvchilarga tizim unumdorligini nazorat qilish, elektr ta’minotni zarur bo‘lganda yo mahalliy elektr tarmog‘iga, yo tizim batareyasiga ulash imkonini beradi.
ADT Solar tizimi
O‘zinining xavfsizlik tizimlari bilan mashhur bo‘lgan ADT kompaniyasi 2021-yilda quyosh energiyasi tizimlarini ishlab chiqaruvchi Sunpro kompaniyasini sotib oldi va uning nomini ADT Solar deb o‘zgartirdi. Kompaniya shundan beri quyosh energiyasi tarmoqlarini ishlab chiqish va ularni o‘rnatish bilan shug‘ullanib keladi. ADT xavfsizlik tarmoqlarini yaratishda boy tajribaga ega bo‘lgani uchun o‘z quyosh energiyasi tizimini bevosita o‘zining “aqlli” uy texnologiyasiga integratsiyalashi mumkin.
Tesla Solar tizimi
Nafis, zamonaviy va yuqori samarali Tesla Solar tizimi eng yaxshi narsalarni xush ko‘radigan uy egalari uchun juda mos keladi. Uyingiz tomi bilan uyg‘unlashib ketishga mo‘ljallangan Tesla quyosh panellari yaqqol ko‘zga tashlanmaydigan panjaraga, past profilga va ilg‘anmas chekkalarga ega. Bu xususiyatlar ularni modabop qiladi. Lekin bu ko‘rkamlik Tesla quyosh tizimlarining “aqlli” emasligini anglatmaydi. Tesla Solar egalari Wi-Fi'ga ulangan o‘z quyosh energiyasi tizimini dunyoning istalgan yeridan onlayn tarzda boshqara oladi.
SmartFlower – gul shaklidagi “aqlli” tizim
O‘zidan yarmiga quyosh paneli, yarmiga ega “san’at asari”ni aks ettirgan SmartFlower quyosh energiyasi tizimi nafis energetik yechim hisoblanadi. 5 metrga yaqin balandlikka ega tizim yaproq ko‘rinishidagi 12 ta quyosh paneli bilan jihozlangan. Bu panellar to‘liq ochiq holatda kungaboqarni eslatadi. Bu nafislik bilan birga tizim juda aqlli hamdir.
SmartFlower kun davomida quyosh harakatlanishini avtomatik tarzda kuzatib boradi va o‘z yuzasini optimal darajada quyosh nuri olish uchun moslashtiradi. Tizim kuchli shamol vaqtida avtomatik ravishda yopiladi va shikastlanmaslik uchun “yaproqlari” bir-birining ustiga yig‘iladi. Qurilma yopilganda tozalash cho‘tkalari panel yuzasini nurning ushlanishiga to‘sqinlik qilishi mumkin bo‘lgan har qanday chiqindidan tozalaydi.
