2023-yilning 1-choragida dunyo bo‘yicha uy-joy narxlarining eng kuchli o‘sishi Turkiyada qayd etildi va yillik hisobda 132,8 foizni tashkil etdi. Narxlar Anqara, Izmir va Istanbul shaharlarida eng ko’p ko‘tarilgan. Bu haqda Britaniyaning ko‘chmas mulk bo‘yicha konsalting kompaniyasi Knight Frank o‘tkazgan tadqiqot natijalariga tayanib NTV telekanali xabar berdi.
Turkiyada uy-joy narxining keskin o‘sishi fevral oyida mamlakat janubi-sharqida yuz bergan falokatli zilzilalardan so‘ng qayd etilgan.
"56 mamlakat va mintaqani tahlil qilgan Knight Frank'ning uy-joy narxlari global indeksiga ko‘ra, 2023-yilning 1-choragida uy-joy Turkiyada eng qimmatlagan. Turkiyada 2023-yilning 1-choragida narxlar 2022-yilning xuddi shu davriga nisbatan 132,8 foizga oshgan”, deb xabar berdi telekanal.
Uy-joy narxining qimmatlashi bo‘yicha Turkiyadan keyingi o‘rinni 18,8 foizlik o‘sish bilan Shimoliy Makedoniya egalladi. Uchinchi o‘rinni 16,6 foizlik o‘sish bilan Xorvatiya, undan keyingi o‘rinni 15,3 foizlik o‘sish bilan Litva egallagan.
Tadqiqotga ko‘ra, Turkiya bilan qo‘shni bo‘lgan Gretsiya va Bolgariyada uy-joy narxlari, mos ravishda, 14,5 va 9,5 foizga oshgan. Yaponiyada uy-joy narxi ko‘tarilishi 6,8 foizni, Fransiyada 2,7 foizni, AQSHda esa bor-yo‘g‘i 0,7 foizni tashkil qilgan.
"Indeksda shaharlardagi narxlar o‘zgarishi ham tahlil qilinadi. Ro‘yxatda Turkiyaning uchta yirik shahri yetakchi o‘rinlarni egalladi: Anqarada narxlar o‘sishi 135,3 foizni, Izmirda 133 foizni va Istanbulda 127,3 foizni tashkil qilgan”, deb ta’kidlanadi xabarda.
