Dubayda Fransiyadagi Versal saroyini eslatuvchi hashamatli uy 750 million dirhamga (204 million dollar) sotilmoqda. Bu uy hashamatli ko‘chmas mulk ommalashgan Dubayda eng qimmat uyga aylandi.
Nufuzli Emirates-Xills tumanida joylashgan uyning ichki maydoni 5574 kvadrat metrni tashkil etadi.
Luxhabitat Sotheby's International Realty brokerlik kompaniyasi ma’lumotlariga ko‘ra, savdo agentlari tomonidan "Marmar saroy" deb nomlangan uyning qurilishi deyarli 12 yil davom etgan va 2018-yilda qurib bitkazilgan. Uni bezashda umumiy qiymati 20 million AQSH dollardan oshadigan italyan toshi qo‘llangan.
Ma’lum qilinishicha, 9 oy davomida 70 nafar malakali ishchi 700 ming varaq susal oltini bilan uyning ichki bezaklarini qoplab chiqqan. Hozirda uy uning egasining shaxsiy san’at asarlari kolleksiyasidan 400 ga yaqin buyum, asosan, 19-20-asrlarga oid haykallar va suratlar bilan bezatilgan. Ta’kidlanishicha, ko‘chmas mulk egasi uyga qo‘shib ularni va mebellarni ham sotishga tayyor.
Brokerlik kompaniyasi mutaxassisi Kunal Singxning aytishicha, uy hammaning ham didiga mos kelmasligi mumkin.
Uynming birinchi qavatida ovqatlanish va ko‘ngil yozish uchun xonalar mavjud. Uy katta maydonga ega bo‘lsa-da, unda 5 tagina yotoqxona bor. Uyning boshqa qulayliklariga 15 ta avtomobil sig‘adigan garaj, 19 ta vannaxona, yopiq va ochiq basseynlar, marjon rifi bilan bezalgan 80 ming litrlik akvarium va elektr podstansiyasi kiradi.
Singxning hisob-kitoblariga ko‘ra, dunyoda «Marmar saroy»ni sotib olishga yetarlicha puli bor va uning tashqi ko‘rinishi bilan qiziqishi mumkin bo‘lgan besh-o‘ntagina xaridor topiladi.
Uyning har kvadrat futi uchun 3400 dollardan so‘ralmoqda. Bu esa uy joylashgan Emirates-Xillsdagi boshqa uylar narxidan ikki baravar qimmatroq. Dubaydagi ko‘chmas mulk haqidagi hisobotlarga ko‘ra, 2022-yilning boshida bu hududdagi eng qimmat uy har kvadrat futi uchun 1528 dollardan, jami 57 million dollarga sotilgan.
Singxning ta’kidlashicha, uy uchun so‘ralayotgan narx uning qurilishiga sarflangan vaqt va materiallarga arziydi.
Emirates-Xills yopiq tumani 20 yil oldin tashkil etilgan va Dubayning Beverli-Xillzi deb ataladi. «Marmar saroy» egallagan umumiy maydon tumandagi eng kattalaridan biri hisoblanadi.
