Niderlandiyaning Xertogenbos shahrida noyob turar-joy mavzesi – Bolwoningen (“sharsimon uylar”) mavjud bo‘lib, u kanal bo‘yida joylashgan 50 ta sharsimon uydan iborat.
Uylar 1968-yilda niderlandiyalik arxitektor va rassom Dris Kreykamp tomonidan demontaj qilinishi oson va boshqa joyga ko‘chirilishi mumkin bo‘lgan arzon uy-joy qurish bo‘yicha hukumat dasturi doirasida ishlab chiqilgan. Biroq, mavzening qurilishi yigirma yil o‘tgach, 1980-yillarning boshidagina boshlangan.
Biroq arxitektorning ushbu g‘oyasi shaharliklar orasida ommalashmadi. Odamlar bunday uylarda yashashni istamadilar. Dunyodagi eng xunuk uylarning AQSH reytingida sharsimon uylar birinchi o‘rinni egallagan.
Har bir “to‘p”-uy silindrsimon asosda joylashgan, shisha tola bilan kuchaytirilgan betondan yasalgan sharsimon struktura bo‘lib, bir-ikki kishiga mo‘ljallangan. Sharning diametri 5,5 metrni tashkil qiladi. Uy ichkarisida burama zinapoyali uch qavatli yashash hududi mavjud bo‘lib, u yerda yotoqxona, vannaxona, oshxona uchun joy bor. Har bir uy 11 ta dumaloq "illyuminator"-oyna bilan jihozlangan va ular evaziga uy ichida doim tabiiy yorug‘lik yetarlicha bo‘ladi. Binoning og‘irligi taxminan 1240 kg.ni tashkil qiladi. Me’morning g‘oyasiga ko‘ra, ushbu konstruksiyani qismlarga ajratib, boshqa joyga ko‘chirish mumkin.
Har qanday oddiy turar-joy mavzesida bo‘lgani kabi, sharsimon uylar ham o‘z raqamiga ega.
Ayni vaqtda noodatiy uylarni talabalar, rassomlar va musiqachilar faol ravishda ijaraga olishadi. Ularda holi qolib, ijod bilan shug‘ullanish mumkin. Bundan tashqari, har yil bu yerga futuristik uylarni o‘z ko‘zlari bilan ko‘rishni yoki hatto bir muddat ularda yashashni istovchi ko‘plab sayyohlar tashrif buyuradi.
