Arxitektura va dizayn muzeyi - Chikago Ateneum muzeyi hamda Yevropa arxitektura, san’at, dizayn va shaharshunoslik markazi 2023-yilgi Xalqaro arxitektura mukofoti (International Architecture Awards 2023) g‘olib loyihalarini taqdim etdi. Ushbu g‘oliblar orasida IDOM, Nikken Sekkei va b720 tomonidan Barselonadagi “Nou Kamp Nou” futbol stadioni dizayni alohida ajralib turadi.
1922-yildan boshlab 60000 tomoshabinga mo‘ljallangan “Les Korts” stadioni "Barselona" futbol klubining asosiy stadioni bo‘lib kelgan. Ko‘plab yillar o‘tgach, 1954-yilda klub uchun "Kamp Nou" deb nom olgan 100000 o‘rinli yangi arena qurilishi boshlangan. Yevropadagi eng katta futbol stadionining ochilishi 1957-yil 24-sentabrda bo‘lib o‘tgan.
"Kamp Nou" o‘zining 65 yillik tarixida ko‘plab ajoyib o‘yinlar va jahon futboli yulduzlarini ko‘rgan. Ammo arena infratuzilmasi hozirgi kunda zamonaviy talablarga javob bermay qo‘ygandi.
Ayni damda “Barselona”ning moliyaviy holati og‘irligiga qaramay, klub rahbariyati o‘zining asosiy arenasini ta’mirlashga kirishdi. Loyiha budjeti 1,5 milliard yevrodan ortiqni tashkil qiladi. Iyun oyining boshida tribunalardan o‘rindiqlar olinib tashlandi, so‘ngra ishga og‘ir qurilish texnikasi tushgan.
"Barsa" 2024-yilning oxirigacha o‘z uy o‘yinlarini Barselonadagi Olimpiya stadionida o‘tkazadi.
"Kamp Nou"ning to‘liq yangilanishi uni 105000 tomoshabinni sig‘dira oladigan, Yevropadagi eng katta stadionga aylantiradi. Loyihada 1957-yildagi ikkita tribunani saqlab qolish, uchinchi tribuna joylashadigan yangi konstruksiyani qo‘shish, oddiy va imkoniyati cheklangan muxlislar uchun lift va eskalatorlar, mehmonlarni kutish uchun ikki qavatli zonalar, butun stadionni qoplaydigan ochilib-yopiluvchi tom, xullas, besh yulduzli futbol arenasi javob berishi kerak bo‘lgan barcha zamonaviy talablar ko‘zda tutilgan.
IAA Awards'ga 2005-yilda asos solingan bo‘lib, u butun dunyo bo‘ylab eng ahamiyatli loyihalarni e’tirof etuvchi nufuzli xalqaro mukofotlardan biri hisoblanadi. 2023-yilda tanlovda ishtirok etish uchun 750 dan ortiq ariza kelib tushgan.
G‘oliblarni taqdirlash marosimi 15-sentabrda Gretsiya poytaxti Afinadagi Akropolda bo‘lib o‘tadi. Bu bilan bir vaqtda, Contemporary Space Athens ko‘rgazmalar markazida mukofotga loyiq topilgan loyihalar ko‘rgazmasi bo‘lib o‘tadi. "Shahar va dunyo" deb nomlanadigan ko‘rgazma 1-oktabrdan boshlab tashrif buyuruvchilarni kutib oladi.
