Dubayda iqlimini nazorat qilsa bo‘ladigan yopiq velosiped trassasi LOOP loyihasi taqdim etildi. URB arxitektura firmasi tomonidan ishlab chiqilgan bu trassa o‘zidan 93 kilometrlik ekologik toza velotrassani aks ettiradi. Uni qurishdan maqsad Dubay aholisini sog‘lom transport turini tanlashga undashdan iborat.
Trassa konstruksiyasi yil davomida iqlim nazoratini ta’minlashga imkon beradi, bu esa velosipedda yurishni shahardagi afzal transport turiga aylantiradi. Loyiha hozirda tadqiqot va ishlanish bosqichida bo‘lib, u hayotga tatbiq qilingach, yangi trassa yordamida Dubay aholisining 80 foizi ishga piyoda yoki velosipedda yetib olishiga umid qilinmoqda.
Loyiha piyoda va velosipedda yurish imkoniyatini taqdim qilib, avtomobillarga tobelikni kamaytirishga qaratilgan. Bu avtomobillarga tayangan Dubay infratuzilmasida sezilarli o‘zgarish bo‘ladi. Yopiq trassada iqlim nazoratidan tashqari, bog‘lar va dam olish hududlari, turli qulayliklar va tadbirkorlik uchun imkoniyatlar yaratish ham rejalashtirilgan.
Dubayni aholi kundalik ehtiyoj joylari va manzillariga piyoda yoki velosipedda 20 daqiqa ichida yetib oladigan “20 daqiqalik” shaharga aylantirish maqsad qilingan. Ushbu tashabbus shaharning 2040-yilga mo‘ljallangan bosh rejasida ko‘rsatilgan. Loyihada, shuningdek, qayta tiklanuvchi energiya manbasini ta’minlash uchun kinetik energiyadan foydalanish rejalashtirilmoqda. Suv zaxiralari sarfini kamaytirish maqsadida sug‘orish tizimlarida qayta ishlanadigan suvdan foydalanish ham ko‘zda tutilgan.
