Italiyaning TISG kompaniyasi dunyodagi eng katta katamaran "This Is It"ning chiqarilishini e'lon qildi. Uzunligi 43,5 metr bo‘lgan kema birinchi marta render suratlarda ko‘rsatildi. "Gigant" katamaran taqdimoti joriy yil Monakodagi yaxtalar ko‘rgazmasida bo‘lib o‘tadi. Hozirda kema qurilmoqda.
"This Is It" nafaqat o‘zining kattaligi, balki o‘ta zamonaviy tashqi ko‘rinishi va interyeri bilan ham ajralib turadi. Katamaran foydalanuvchisi 600 kvadrat metrlik hashamatga ega bo‘ladi. Unda sauna, massaj zonasi, suzish havzasi, majlislar zali, 12 kishi uchun yotoqxonalar, bar va oshxonaga ega ovqatlanish xonasi, ish xonasi, ochiq va yopiq terassalar, bir nechta dam olish joylari mavjud bo‘ladi.
Barcha jihozlar bronza, platina, oltindan yasaladi va alkantara, charm hamda zamsh bilan qoplanadi. Shu bilan birga, dizaynerlar interyerni juda dabdabali emas, aksincha, vazmin va zamonaviy qilishga harakat qilishgan.
Katamaran bir vaqtning o‘zida, ekipaj a’zolaridan tashqari, 12 nafargacha mehmonni qabul qila oladi. Kema soatiga 36 km.gacha tezlikka erishadi. U yonilg‘I bilan to‘liq bo‘lganda 3500 dengiz milini (6480 km) bosib o‘ta oladi.
Katamaran 2024-yil aprel oyida dengizga chiqishga tayyor bo‘ladi. U dunyodagi eng yirik motorli katamaran bo‘ladi. "Suv taksisi"ning narxi hozircha noma’lum.
