Mayamida Dolce&Gabbana modalar uyi buyurtmasi bilan balandligi 320 metr bo‘lgan 90 qavatli osmono‘par bino quriladi. 888 Brickell deb nomlanadigan bino shahardagi binolar uchun Federal aviatsiya ruxsatnomasi ruxsat bergan maksimal balandlikka yetadi hamda qurilishi 2027-yilda tugallanadi. Shundan so‘ng u boshqa bo‘lajak yorqin loyihalar, jumladan, Waldorf Astoria Miami va The Towers kabilar orasida shaharning eng baland binosiga aylanadi.
Yangi turar-joy binosi va 5 yulduzli mehmonxona ortida turgan modalar uyi o‘zining podiumdagi namoyishlari va qizil gilamdagi chiqishlari bilan ko‘proq mashhur. Mayami markazida qad rostlaydigan bino Dolce&Gabbana brendining ko‘chmas mulk bozoriga birinchi qadamini anglatadi.
Binoda yashovchilar uchun ularning kundalik hayotida modalar uyining ishtirok etishi nafaqat bir va to‘rt xonali kvartiralarning asosi va hashamatli qulayliklar bo‘ladi, balki binodan joy oladigan 259 ta uyning har biridagi barcha narsalar yaratilishida bosh-qosh bo‘ladi, deb aytgan binoni ishlab chiqqan kompaniya JDS Development Group bosh direktori va asoschisi Maykl Stern.
“Biz kvartiralarni to‘liq tayyor holda sotamiz - ularni bezatamiz va mebellar hamda xalatdan tortib kitob javonidagi kitoblargacha bo’gan aksessuarlar bilan jihozlaymiz” , deb qo‘shimcha qilgan Stern.
Dolce&Gabbana asoschilari Domeniko Dolche va Stefano Gabbana tomonidan ishlab chiqilgan intererlar uchta rang – oq, qora va tillarangda taqdim etiladi.
Binoning render suratlarida hashamatli detallar, jumladan, Venetsiya qandillari va okean manzaralari ochiladigan vannalar ko‘rsatilgan.
888 Brickell'da yashovchilar hashamatli binolarda taklif etiladigan odatiy qulayliklar, jumladan, restoranlar, barlar, fitnes va sog‘lomlashtirish markazlari, umumiy ofislar va majlislar zallaridan foydalana olishadi. Bundan tashqari, binoda ular ixtiyorida 13,5 metrlik suv havzasiga ega va Atlantika okeani, Biskayn ko‘rfazi va Mayami-Bich manzaralari ochiluvchi 372 kvadrat metrlik terrasa bo‘ladi.
Binodagi kvartiralar narxi taxminan 3,5 million dollardan boshlanadi, eng qimmatlariniki esa 35 million dollardan oshadi.
Dolce&Gabbana'ning imiji binoni AQSHda talabgir mulkka aylantira oladimi? Brend, albatta, Florida shtatida shunday loyihalarni amalga oshirayotgan hashamat sohasidagi yagona yetakchi emas. Jumladan,shtatda Armani o‘zining osmono‘par binosidagi aholi uchun xususiy plyajni taklif qilmoqda, Volkswagen Group'ga tegishli Bentley va Porsche avtomobil brendlari ham shtat sohillarida osmono‘par binolar qurmoqda.
So‘nggi yillarda butun dunyo bo‘ylab o‘z mehmonxonalarini ochayotgan moda uylari soni keskin ko‘paygan. Ular orasida, jumladan, Bulgari, Versace va Roberto Cavalli kabi brendlar bor.
Aprel oyida Dolce&Gabbana Marbella (Ispaniya) va Maldiv orollarida qo‘shimcha turar-joy va mehmonxona loyihalarini rejalashtirib, ushbu sektorga kirishini rasman e’lon qilgandi.
