Avstraliyaning Viktoriya shtatidagi Eyldon ko‘lida ko‘plab suzib yuruvchi uylarni ko‘rish mumkin. Mahalliy aholi uchun bu odatiy manzara hisoblanadi. Jolson Architecture and Interiors studiyasi dizaynerlari ushbu an’anani biroz "zamonaviylashtirishga" qaror qilishdi va o‘ta zamonaviy Halcyon suzuvchi uyini loyihalashtirishdi. Ular ushbu uyni ishlab chiqishda yaxtalar va katerlardan ilhomlanishgan.
Eyldon ko‘lidagi odatiy suzuvchi uy qutiga o‘xshaydi, Halcyon'ning tashqi ko‘rinishi esa yumaloqlangan burchaklar va silliq chiziqlar bilan yaratilgan. Uyning ichki qismini yaratishda ko‘zlangan asosiy maqsad ichki makonlarni tabiat bilan uyg‘unlashtirish bo‘lgan. Bunga erishish uchun suzuvchi uy rejasi imkon qadar ochiq, oynalar esa atrofni tomosha qilsa bo‘ladigan qilib loyihalangan.
Oynali tizim umumiy xonani ochiq havodagi ovqatlanish hududi bilan bog‘laydi. Zinapoya ikkinchi qavatdagi to‘rtta yotoqxonaga olib boradi, ulardan ikkitasida vannaxonalar mavjud.
.
Suzuvchi uyning interyeri yorug‘, sokin ranglarda bezatilgan, ichki makon nafis va zamonaviy ko‘rinadi hamda atrofdagi tabiat bilan uyg‘unlashib ketadi.
Uyning yuqori qavatida dam olish hududiga ega ochiq paluba mavjud: undagi katta tim shezlonglar, bar hududi va ochiq havodagi aylana divanga soya berib turadi. Shuningdek, u yerda gidromassaj vanna ham bor bo‘lib, kunduzi undan ko‘l va milliy bog‘ manzaralarini, kechasi esa yulduzlarni kuzatish mumkin.
