3D printer yordamida dunyodagi ilk ikki qavatli uy qurildi. Uy Yevropadagi eng kuchli beton 3D printer BOD2 yordamida barpo etilgan. Shu tufayli oldimizda ertangi kun uylari haqida tushuncha paydo bo‘ldi.
Ushbu “texnologik mo‘jiza” Belgiyadagi eksperimental arxitektura kampusida qad rostladi. Binoning balandligi 8 metrni tashkil qiladi.
Hozirda "bosma" uylar quruvchilari uchun bir qavatli bino qurish ular orzularining cho‘qqisi bo‘lib qolmoqda. 3D bosma olamida "ko‘p qavatli" obyektlar juda kam uchraydi. Odatda, 3D printer yordamida quriladigan ikki va uch qavatli binolar uchun bloklar zavodda alohida-alohida bosiladi va keyinroq qurilish maydonchasida bir-biriga "yopishtiriladi". Belgiyaning Kamp C kompaniyasi o‘z bosma texnologiyasini ishlab chiqishga va yuqorida keltirilgan cheklovni yengishga muvaffaq bo‘ldi. Kompaniya joylashgan Vesterlo shahrida 3D printer bilan qurilgan ikki qavatli uy o‘zidan betonli yaxlit konstruksiyani aks ettiradi. Tajribaviy uy bevosita qurilish maydonchasida bir seansda bosilgan.
Loyiha mualliflari devor va shiftlarni mustahkamlamaslikka qaror qildilar – uyning faqat bir nechta muhim joylari armatura bilan kuchaytirilgan, masalan, deraza darchalari usti. Ehtimol, binoning barqarorligi siri beton aralashmada bo‘lishi mumkin. Unda cho‘kishni kamaytiruvchi maxsus tolalar mavjud. Buning evaziga betonning qotishi vaqtida uning yorilishidan qochishga erishigan.
Binoning fasadi Gollandiyaning Pixasolar kompaniyasi quyosh panellari bilan qoplangan.
Qayd etilishicha, uyni qurishda an’anaviy tarzda qurilgan shu o‘lchamdagi binoga nisbatan 60 foiz kam xomashyo sarflangan. Ushbu loyiha umumiy qiymati 1,6 million yevro bo‘lgan budjet doirasida amalga oshirilgan, bu summadan 40 foizi Yevropa Ittifoqi tomonidan ajratilgan. Qurilishga tayyorgarlik bir necha oy davom etgan, ammo uning o‘zi atigi uch hafta vaqt olgan.
Qurilish shiftga kiritilgan loyga asoslangan yangi texnologiyani o‘z ichiga olgan. Ushbu innovatsion yechim bino ichidagi harorat va namlikni bir maromda tartibga soladi.
“Yaxlit tarzda qurilgan bosma uy”ning tez muddatlarda barpo etish mumkinligi uning yagona ustunligi emas. Unda turli materiallar va qismlar o‘rtasida ulash joylarining yo‘qligi sovuq kirishi mumkin bo‘lgan tirqishlar paydo bo‘lishidan va ularni bartaraf etish uchun keyingi harakatlardan qochish imkonini beradi. Kompaniya taklif qilayotgan texnologiyaning yana bir ustunligi – uning xavfsiz ekanidir. “COVID‑19 xavfi ortida shuni ta’kidlash lozimki, printerni masofadan turib boshqarish mumkin. Bunda qurilish maydonchasining o‘zida bir necha quruvchigina talab etiladi, xolos", deb aytgan loyiha menejeri Mareyke Arts.
