Telegram asoschisi, bir necha yil avval Birlashgan Arab Amirliklariga ko‘chib o‘tgan Pavel Durov Dubayning eng nufuzli hududlaridan biri – Jumeyra orollari majmuasida villani ijaraga oldi, deb xabar bermoqda manbalarga tayanib Forbes nashri.
Milliarder beshta yotoqxonasi va taxminan 1393,5 kvadrat metr maydonga ega villaga joylashdi. Villa ijarasi yiliga 1 million dollarni (oyiga 83,3 ming dollardan ko‘proq) tashkil etadi. Forbes ma’lumotlariga ko‘ra, bu Jumeyra orollaridagi eng qimmat ijara shartnomalaridan biri bo‘ldi.
Jumeyra orollarida 2000-yillarning boshida qurilgan hudud aylana shaklidagi 46 ta alohida klasterlardan iborat bo‘lib, ularning har birida taxminan 16 ta villa mavjud. Har bir villaning o‘z bog‘i va suv havzasi bor. Hududda ikkita restoran, xususiy sport zali ham mavjud.
Durov 2017-yilda Dubayga ko‘chib o‘tganidan so‘ng Telegram bosh ofisi joylashgan Dubai Media City erkin iqtisodiy hududi atrofidagi turli joylarda yashab kelgan.
Durov Rossiyada tug‘ilgan, biroq 2014-yilda mamlakatni tark etgan va u yerga qaytish niyati yo‘qligini aytgan. U 2013-yilda Sent-Kits va Nevis Federatsiyasi, 2021-yilda Fransiya, 2022-yilda esa BAA fuqaroligini olgan. Durov Forbes’dan uni rossiyalik biznesmen deb atamaslikni so‘ragan va hozirda nashrning milliarderlar global reytingida BAA fuqarosi sifatida qayd etiladi. Oxirgi ma’lumotlarga ko‘ra, u 11,5 milliard dollarlik boylik bilan BAAning eng boy odamlari ro‘yxatida 1-o‘rinni egallamoqda.
