Ispaniyalik tadbirkor, Zara do‘konlar tarmog‘i asoschisi Amansio Ortega yana bitta osmono‘par bino sotib oldi. Bu safar u Chikagodagi ko‘p qavatli uyni tanladi, deb xabar berdi Bloomberg.
Tadbirkor 727 West Madison turar-joy binosini 232 million dollarga xarid qildi. Shu tariqa, milliarder hashamatli ko‘chmas mulklar sonini yana bittaga ko‘paytirdi.
151 metrlik binoda 492 ta hashamatli kvartira bor bo‘lib, undagi studiya ko‘rinishidagi kvartira ijarasi oyiga 2,2 ming dollardan boshlanadi. Uch xonali kvartiraga esa oyiga 6000 dollar to‘lashga to‘g‘ri keladi.
2022-yil dekabr oyida ham Ortega o‘z kompaniyasi orqali AQSHda osmono‘par bino sotib olgan. O‘shanda Siyetldagi 40 qavatli Kiara binosi tadbirkorning ixtiyoriga o‘tgan. Bino 2018- yilda qurilgan bo‘lib, balandligi 133 metrga yetadi. Tadbirkor ko‘chmas mulk uchun 322,7 million dollar to‘lagan.
Bundan tashqari, Ortega AQSH va boshqa davlatlarda ko‘plab boshqa ko‘chmas mulklarga ega.
Ispaniyalik tadbirkor daromadining katta qismini o‘ziga tegishli Inditex kompaniyasi dividendlaridan oladi hamda uni Pontegadea firmasi orqali ko‘chmas mulkka tikadi. Ma’lumotlarga ko‘ra, tadbirkorning barcha ko‘chmas mulki qiymati 2022-yil oxirida 18,1 milliard yevroni tashkil qilgan.
87 yoshli Ortega nafaqat muvaffaqiyatli biznesmen, balki saxovatpesha hamdir. Ispaniyalik ishbilarmon hozirda Forbes nashrining dunyo milliarderlari ro‘yxatida 88 mlrd. dollar bilan 14-o‘rinni egallamoqda.
