Meksikada ulkan ilon shaklida qurilgan uyni haqli ravishda dunyodagi eng g‘ayrioddiy uylar qatoriga kiritish mumkin. Me’mor Xaver Senosyan tomonidan yaratilgan ushbu uy ilk soniyalardanoq hayratga soladi. Naukalpan-de-Xuares deb nomlangan joyda qurilgan “Ilon-uy” ommani o‘ziga jalb qilishga ulgurgan. Bu ajoyib binoni bevosita his qilishingiz mumkin – uni Airbnb uy-joy ijara xizmati orqali ijaraga olish mumkin.
Uy ulkan ilon shaklida qurilgan. Ta’kidlanishicha, me’mor uyni qurishda buyuk me’morlar Frank Lloyd Rayt, Antonio Gaudi va Luis Barraganning durdona asarlaridan ilhomlangan. Me’mor qulay hayot uchun zarur bo‘lgan barcha narsalarni o‘zida qamragan 50 metr uzunlikdagi bino yaratdi. Uy xonalari dizayni eng mayda detallargacha o‘ylangan hamda 8 nafargacha mehmonni sig‘dira oladi.
Uy ichida eshiklar yo‘q, xonalar yo‘laklar bilan bog‘langan. Quyosh nurlari uy ichiga illyuminator ko‘rinishidagi derazalar orqali kiradi.
Yetarlicha katta hududga ega ushbu majmua faqat Airbnb mijozlari uchungina ochiq: hududda noyob daraxtlar o‘sadi, hovuzlar, g‘orlar va hatto sharsharalar bor! Bundan tashqari, uy egasi ekskursiyalar o‘tkazib turadi, ular davomida siz ushbu joy va u yerga xos madaniyat haqida juda ko‘p qiziqarli ma’lumotlarni bilib olishingiz mumkin.
