"Real Madrid" futbol klubi rekonstruksiya qilingan va qurilishi yakunlanish arafasida turgan "Santyago Bernabeu" stadionida ilk o‘yinini o‘tkazdi.
"Real " yangilangan uy maydonida Ispaniya chempionatining 4-turi doirasida 2-sentabrda "Xetafe" jamoasiga qarshi o‘ynadi. Bu o‘yin klubning stadiondagi ta’mirlash ishlari boshlanganidan beri birinchi o‘yini bo‘ldi.
Maydondagi ishlar deyarli nihoyasiga yetgan. Muxlislar yangi o‘rindiqlarni sinab ko‘rishgan hamda stadionning tushirib-ko‘tariladigan maysazori, ochib-yopiladigan yangi tomi va yoritgichlarini ko‘zdan kechirishgan.
«Santyago Bernabeu»ni rekonstruksiya qilish 2019-yilda boshlangan. Stadionni ta’mirlash klubga 500 million yevroga tushgan.
Rekonstruksiya vaqtida stadionga ochib-yopiladigan tom va po‘lat fasaddan tashqari, tribunalar ustida joylashgan terrasa, maydonni olib turish va saqlash tizimi qo‘shilgan.
Stadionni katta ko‘lamdagi tadbirlar o‘tkaziladigan joy sifatida qo‘llash imkonini hisobga olib loyihalangan tushirib-ko‘tariladigan maydon oltita yerosti qavatida joylashadi. U maysa sifatini saqlab qolish uchun yerosti sug‘orish va ultrabinafsha yoritish tizimi bilan jihozlangan.
Ta’mirlash stadion sig‘imdorligini 81000 kishidan 85000 kishigacha oshiradi.
Stadionni yangilash loyihasi ustida 2019-yildan boshlab L35 va Ribas & Ribas ispan hamda GMP Architecten nemis studiyalari ish olib borgan.
Dunyodagi eng mashhur stadionlardan biri bo‘lgan «Santyago Bernabeu» 1947-yilda arxitektorlar Manuyel Munyoz Monasterio va Luis Alemani Soler loyihasi asosida qurilgan. O‘shandan beri u bir nechta yangilanishlarni boshdan kechirgan.
Avvalroq “Barselona” futbol klubining bo‘lajak stadioni loyihasi IAA Awards 2023 xalqaro arxitektura mukofotiga sazovor bo‘lgani xabar qilingandi.
