Aksariyat zamonaviy odamlar megapolislardagi ko‘p qavatli “quti” shaklidagi binolarga ko‘nikib bo‘lgan, deb o‘ylansa-da, ammo vaqti-vaqti bilan haqiqiy arxitektura durdonalari paydo bo‘lib turadi. Boz ustiga, ular muzeylar, kutubxonalar yoki boshqa jamoat binolari emas, balki oddiy odamlarning uylaridir.
Quyida egalari odatiy chegaralardan tashqariga chiqishga qaror qilgan 14 ta eng noodatiy uylar keltirilgan.
1. Uchar likopcha ko‘rinishidagi uy
Tennessi shtatidagi Signal tog‘iga yaqinlashayotib, tog‘ tepasida o‘zga sayyoraliklarning qo‘nib turgan uchar likopchasini ko‘rishingiz mumkin. Aslida, bu 135 ming dollarlik uy bo‘lib, uning ichida “koinot bilan bog‘liq” hech qanday narsa yo‘q - u uchta yotoqxona va mehmonlar uchun xonadan iborat oddiy uy.
2. Qo‘ziqorin-uy
AQSHning Sinsinnati universitetida dizayn, arxitektura, san’atdan dars bergan arxitektor Terri Braun o‘ziga ulkan qo‘ziqoringa o‘xshash uy qurdi. Bu “qo‘ziqorin-uy” faqat bitta yotoqxonaga ega, ammo uni qurish uchun 14 yil kerak bo‘lgan.
3. Ko‘pik-uy
1200 kvadrat metrli “ko‘pik-uy” 1970-yillarda fransuz dizayneri Per Karden uchun Kannda qurilgan. Unda o‘nta zamonaviy yotoqxona, ulkan bog‘ va ochiq suv havzasi mavjud. Uydan O‘rta yer dengiziga ajoyib manzaralar ochiladi.
4. Geliouy
Fransiyada noyob arxitekturaga ega uylar juda keng tarqalgan. Ular ichida eng noyoblaridan biri Elzasdagi Geliouy bo‘lib, u nafaqat quyosh soatiga o‘xshash, balki u kabi ishlaydi. Sovuq oylarda quyosh nuri xonalarni isitadi, yozda esa uy salqin bo‘ladi.
5. Kub shaklidagi uy
Niderlandiyada boshqa uylarning tomlaridan go‘yoki yumalab, chekkasi bilan ular ustida turib qolgan ulkan narda toshlariga o‘xshash uylarni uchratishingiz mumkin. Ushbu noodatiy uylarni me’mor Piyet Blom g‘ayrioddiy shakldagi binolar "urf" bo‘lgan 1970-yillarda loyihalashtirgan.
6. Qoya ustidagi uy
Bu antiqa uy Serbiyadagi Baina-Bashta shahridan oqib o‘tuvchi daryoning o‘rtasidan chiqib turgan qoyada joylashgan. Rivoyatlarga ko‘ra, uy 1968-yilda suzish vaqtida dam olish uchun joy izlagan sayyohlar tomonidan qurilgan.
7. Etik-uy
Xellam shahridagi (AQSH) 8 metrlik bu ulkan “etik-uy” 1948-yilda polkovnik Malon Nataniyel Xeyns tomonidan qurilgan. U shu tariqa o‘zining qirqta poyabzal do‘konini reklama qilmoqchi bo‘lgan. Endilikda "etik-uy" muzey bo‘lib, bir vaqtlar keksalar uchun mehmonxona sifatida ham ishlatilgan.
8. Sharshara-uy
Pensilvaniya butun AQSHda o‘zining go‘zal tog‘lari va qishloqlari bilan mashhur. Shu sababli aynan bu yerda sharshara ustida uy qurilganiga ajablanmasa ham bo‘ladi. Ushbu uyni AQSHning eng mashhur arxitektori Frank Lloyd Rayt 1936-yilda Kaufmanlar oilasi uchun loyihalashtirgan. Endilikda Pitsburgdagi bu uy milliy yodgorlik hisoblanadi.
9. Qulupnay-uy
Yaponiya dunyoda qulupnay shaklidagi uyni topish mumkin bo‘lgan yagona joydir. Sanrio kompaniyasi "qulupnay-uy"ni 1984-yilda qurgan. Dastlab Tokiodagi ushbu inshootni bolalar uchun savdo markazi qilish mo‘ljallangan.
10. Choynak-uy
Katta choynak ko‘rinishidagi ushbu uy Texas shtatidagi Galveston shahri yaqinida qurilgan. Binoning devorlari po‘latdan, tomi esa yog‘ochdan yasalgan. Dovullari bilan mashhur bo‘lgan ushbu joyda mana 50 yildan ortiq beshikast turgan uy kim tomonidan va nima uchun qurilgani noma’lum.
11. Zarhal piramida shaklidagi uy
Misrdagi ehromlar nima uchun qurilganining aniq sababini hali ham hech kim bilmasa-da, bugungi kunda ko‘pchilik ulardan hayratlanadi. Jim va Linda Onan 1977-yilda Illinoys shtatidagi Vadsvort shahrida 1600 kvadrat metrlik zarhal “piramida-uy”ni qurganda aynan Misr ehromlardan ilhomlangani aniq.
12. Boshdan oyoq o‘girilgan uy
Niagara sharsharasi o‘zining go‘zal manzaralari bilan dunyoga mashhur. Bu o‘lkalarda yana bir diqqatga sazovor joy - Kanadaning Ontario shahrida sharsharaning pastki qismida joylashgan boshdan oyoq o‘girilgan uy bor. Bugungi kunda “teskari” uyga ekskursiyalar tashkil etiladi.
13. Samolyot-uy
Samolyotda yashash qanday ekanligiga qiziqqanlar shuni bilishlari kerakki, Joan Asseri Boeng-727 samolyotini o‘z uyiga aylantirganida buni boshdan o‘tkazib bo‘lgan. Noodatiy uy Missisipida (AQSH) joylashgan. 1994-yilda Joanning uyini bo‘ron vaqtida qulagan daraxt bosib qolgach, u akasining maslahati bilan chiqindixonadan samolyot sotib olishga va uni haqiqiy uyga aylantirishga qaror qilgan.
14. “Piyoda yuruvchi” uy
Ba’zi odamlar bir joyda uzoq vaqt qolishni yoqtirmaydilar. Ular uchun tashqi kommunikatsiyalarga ehtiyoj sezmaydigan va istalgan joyga sayohat qila oladigan "piyoda yuruvchi uy" ayni muddao bo‘ladi. To‘rt kishi yashashi uchun mo‘ljallangan bunday “mo‘jiza” Daniyaning Kopengagen shahrida qurilgan.
