Shimoliy Kaliforniyada yashirincha tarzda 800 million dollarlik yer sotib olgan Silikon vodiysi milliarderlari ushbu yerda «yashil» shahar qurish bo‘yicha rejalarini oshkor qilishdi.
Ular Solano okrugi hududini go‘zal shaharchaga aylantirishmoqchi. Bu haqda Flannery Associates kompaniyasiga egalik qiluvchi California Forever kompaniyasi taqdim etgan yangi shaharning chizmalari darak bermoqda.
Flannery Associates 2018-yildan beri Solano okrugining sharqiy qismida texnologik olamning Rid Xoffman, Mark Andreyessen va aka-uka Kollison kabi eng yorqin vakillari ko‘magida 202 kvadrat kilometrdan ortiq yerni sotib olgan. Shahar loyihasi o‘n minglab aholini ikki qavatli uylarda joylashtirishni nazarda tutadi. Mahalliy fermer xo‘jaliklari sotib olingan hududda o‘z faoliyatini davom ettirishi bilan birga u yerda uy-joy, quyosh elektr stansiyalari, ochiq maydonlar barpo etish hamda qishloq xo‘jaligini va yashash muhitini saqlab qolish rejalashtirilgan.
Biroq, loyihani amalga oshirish muayyan qiyinchiliklar bilan bog‘langan. Jumladan, mahalliy hokimiyat idoralaridan qishloq xo‘jaligi yerlarini shahar uchun qo‘llashga ruxsat olish lozim.
Ta’kidlanishicha, ayni vaqtda Kaliforniya ko‘proq uy-joyga, ayniqsa o‘qituvchilar, o‘t o‘chiruvchilar, xizmat ko‘rsatish va mehmonxona sohalari ishchilari uchun arzon uylarga ehtiyoj sezadi. Biroq shaharlar va okruglar bunday uy-joyni qayerga qurishni bilisha olmayapti, chunki hududlardagi mahalliy aholi bunga qarshi chiqmoqda. Ular yangi uylar qurilishi yo‘llarning tirbandligiga olib kelishi va osuda hayot tarzlarini buzishi mumkinligidan xavotirlanishmoqda.
