Mayamidagi birinchi o‘ta baland bino hisoblangan Waldorf Astoria Residences Miami majmuasida 50 million dollarlik kvartira sotuvga qo‘yildi. Agar ko‘chmas mulk shu narxga sotilsa, Mayamida sotilgan eng qimmat kvartiralardan biriga aylanadi.
Biroq, u bir-birining ustiga o‘rnatilgan kublar ko‘rinishidagi binoda eng qimmat kvartira bo‘lmaydi. Bino quruvchilaridan biri bo‘lgan Property Markets Group boshqaruvchi hamkori Rayan Shirning so‘zlariga ko‘ra, sotilayotgan uyning shundoq yuqorisida joylashgan, 2790 kvadrat metr maydonga ega pentxausni sotib olish bo‘yicha xaridor bilan shartnoma tuzilgan. Ushbu kvartiraning bahosi taxminan 90 million dollarga baholanmoqda.
50 million dollarlik kvartira 1220 kvadrat metr maydonga ega va butun bir qavatni egallaydi. U xaridorning xohishiga monand moslashtirilishi mumkin. Taklif etilayotgan kvartira oltita yotoqxona va to‘qqizta hammom, shaxsiy sport zali, teatr, vino xonasi, kutubxona, spa-salon va Mayami-Bich, Mayami markazi va Atlantika okeaniga manzaralar ochiluvchi yopiq balkonlarni o‘z ichiga oladi.
Quruvchi kompaniya minora qurilishini 2022-yilda boshlagani va 2027-yilda qurilishni yakunlashni rejalashtirayotganini aytgan. Loyihaga 205 ta mehmonxona xonasi va 360 ta kvartira kiradi.
Binodagi turar-joylar sotuvi 2021-yil mart oyida boshlangan. Undagi studiya kvartiralar narxi 1 million dollardan boshlanadi. Shirning so‘zlariga ko‘ra, Mayamidagi hashamatli buyumlar bozoridagi sustlashuvga qaramay, hozirda binoning deyarli 90 foizi sotib bo‘lingan.
Arxitektorlar o‘ta baland minoralar deganda, 300 metrdan balandroq binolarni nazarda tutishadi. Nyu-York shahrida so‘nggi yillarda juda ko‘p o‘ta baland binolar paydo bo‘lgan bir vaqtda, balandligi 304 metrdan oshiq bo‘lgan Waldorf minorasi Mayamidagi birinchi shunday bino bo‘ladi.
