Qatar Nyu-Yorkdagi ko‘chmas mulk sohasida kengayishni davom ettirar ekan, mamlakatning suveren jamg‘armasi bir vaqtlar "rivojlanish uchun dunyodagi eng yaxshi joy" deb atalgan va shahardagi markaziy boqqa qaragan Park Lane mehmonxonasini sotib oldi.
Qatarning investitsiyalar boshqarmasi Central Park South, 36 manzili bo‘yicha joylashgan 46 qavatli mehmonxonani sotib olish uchun amerikalik ko‘chmas mulk sarmoyadori Stiv Vitkoff kompaniyasiga qariyb 623 million dollar to‘lagan.
450 milliard dollarga ega Qatarning farovonlik suveren jamg‘armasi 1960-yillarda Garri Xelmsli tomonidan loyihalashtirgan mulk borasida qanday rejalarga egaligi hozircha noma’lum.
Vitkoff mehmonxonani 2013-yilda 654 million dollarga sotib olgan va binoning aksariyat qismi, taxminan 600 ga yaqin xonasini hashamatli kvartiralarga aylantirishni rejalashtirgan. Ammo 2016-yilga kelib, u va uning sheriklari – Garri Maklou va Xovard Lorber shaharning hashamatli uy-joy bozori to‘lib ketgan, deb qaror qilishadi. Shu sababli ular mehmonxonani o‘zgartirishni to‘xtatadilar.
Bir necha oy o‘tgach, Xitoyning Greenland Group kompaniyasi loyihaning 41 foiz ulushini Kuwait Strategic Investors kompaniyasidan sotib oladi. Shundan keyin mehmonxonani o‘zgartirish loyihasi yana o‘z yo‘liga qaytgandek bo‘ladi.
Ammo xarid bo‘yicha bitim yopilganidan ko‘p o‘tmay, Abu-Dabi farovonlik suveren jamg‘armasi – Mubadala Investment Company'dan 4 milliard dollar o‘g‘irlaganlikda ayblangan malayziyalik tadbirkor Jo Louga nisbatan tergov doirasida mehmonxonani musodara qilish maqsadida da’vo qo‘zg‘atiladi.
Shundan keyin Vitkoff ko‘chmas mulkni 2017-yilda sotuvga qo‘yadi.
"Bu rivojlanish uchun dunyodagi eng yaxshi obyekt", deb ta’rif bergan o‘shanda binoga JLL kompaniyasi mutaxassisi Jeffri Devis.
Vitkoff va uning sheriklari ko‘chmas mulkka katta umid bog‘lashgan, ammo ular mehmonxona uchun so‘ragan 1 milliard dollarni to‘laydigan odam topilmagan.
