Dunyodagi eng mashhur tashlandiq shaharlardan biri Burj Al-Babas deb atalib, u Turkiyada joylashgan. Bir vaqtlar u millionerlar uchun hashamatli kurort sifatida loyihalangan. Ammo undagi Disney multfilmlaridagi qasrlarga o‘xshash hashamatli uylar oxirigacha qurilmay tashlab qo‘yilgan.
Kimsasiz shaharlar yoki “arvoh-shaharlar” ko‘p uchrab turadi. Bu qurilishlar avj pallasining aksi tomoni bo‘lib, foyda olishga intilib katta ko‘lamli loyihalarni boshlagan quruvchilar keyinchalik turli sabablarga ko‘ra (odatda, moliyalashtirish to‘xtatilganligi sababli) ularni oxirigacha yetkaza olmaydilar. Bunday tashlandiq uylarni shunchaki tashlab ketish ularni buzishdan ko‘ra arzonroq tushadi – shu sababli ular shu holicha tashlab ketiladi.
Dunyodagi tashlandiq shaharlarning eng mashhurlaridan biri Turkiya tog‘larida joylashgan bo‘lib, hashamatli kurort bo‘lishi kerak bo‘lgan yirik loyiha Sarot Group kompaniyasining eng katta muvaffaqiyatsizligiga aylangan. U uchli minoralarga ega 587 ta bir xil uydan tashkil topgan.
Xorijliy badavlat insonlar uylarni go‘yoki tandirdan chiqqan nonlardek talab ketishadi, deb taxmin qilingan. Garchi quruvchi kompaniya ilk uylar Qatar, Quvayt, Bahrayn va Saudiya Arabistonidan bo‘lgan arab millionerlari tomonidan sotib olinganini xabar qilgan bo‘lsa-da, biroq o‘rmonda joy olgan uylar uchun 370 ming dollardan 500 ming dollargacha to‘lashga tayyor bo‘lganlar ko‘p bo‘lmagan.
Burj Al-Babasni qurish uchun istiqbolli joy tanlangan. Majmua qaynoq buloqlari bilan mashhur bo‘lgan qadimiy shahar Mudurnu yaqinidagi tepaliklarda joylashgan. Villalar issiq pollar va shifobaxsh suvli jakuzilar bilan jihozlanishi rejalashtirilgan. Shaharcha qurilishi 2014-yilda boshlangan va 4 yil ichida yakunlanishi kerak edi. Qurilish jarayonida quruvchi kompaniya kasodga uchragan, mahalliy aholi esa burunlari ostida millionerlar uchun shaharcha qurilishiga qarshi kampaniya boshlagan. Natijada qurilish to‘xtatilgan va uylar o‘shandan beri tashlandiq holda qolmoqda.
Hammani o‘ylantirayotgan asosiy savol - Burj Al-Babas qurib bitkaziladimi-yo‘qmi? Aslida, uylarning qurib bitkazilishi dargumon. Ta’kidlanishicha, Sarot Group ishlarni qayta boshlashga va’da bergan bo‘lsa-da, unda na kerakli mablag‘, na sarmoyadorlar bor, uylar esa yildan-yilga yaroqsiz holga kelmoqda. Yaqindan uylar qo‘rqinchli manzara hosil qiladi va bu joy yomon nom bilan tanilgan.
