Yuz yildan ortiq vaqt davomida ommadan yashirib kelingan Londondagi harbiy bino hashamatli Raffles London mehmonxonasiga aylantirildi. Avval harbiy vazirlik joylashgan bino o‘zgarishlardan so‘ng bir necha hafta ichida o‘z eshiklarini tashrif buyuruvchilar uchun ochadi.
Avval ushbu binoda Buyuk Britaniyaning sobiq bosh vaziri Uinston Cherchill kabi harbiy rahbarlar faoliyat olib borgan. Hozirda esa u hashamatli xonalarida bir kechani o‘tkazish 1100 funt sterlingdan (taxminan 1392 dollar) boshlanadigan, Buyuk Britaniyadagi birinchi Raffles mehmonxonasiga aylandi.
Marhum fransuz arxitektori Terri Despon bilan hamkorlikda ishlab chiqilgan Otel Raffles London at The OWO mehmonxonasi o‘z mijozlariga 120 ta standart va luks xonani, 600 kishilik ziyofatlar zali va Guerlain brendining Londondagi birinchi spa-salonini taklif etadi. Mehmonxona ochilishi joriy yilda eng kutilganlaridan biri hisoblanadi.
Tarixiy bino, shuningdek, britaniyalik yozuvchi Ian Fleming Britaniya dengiz razvedkasi zobiti bo‘lib ishlagan kezlarida unga josus Jeyms Bond haqida romanlar yozish g‘oyasi kelgan joy hamdir.
Agent 007'ning muxlislari binoning ba’zi qismlarini tanishlari ham mumkin, chunki u Jeyms Bond haqida «Spektr», «Sakkizoyoq» va «O‘ldirish uchun ruxsatnoma» kabi filmlarni suratga olish joyi sifatida ishlatilgan.
Arman millatiga mansub aka-uka Sarkislar tomonidan 1887-yilda asos solingan va zamonaviy Singapur asoschisi hisoblangan ser Stemford Raffles sharafiga Raffles deb nomlangan mehmonxonalar brendi Britaniya poytaxtiga kelishi uchun nimaga shunchalik uzoq vaqt talab qilindi?
“Bizga ma’qul keladigan joy kerak edi. Va ushbu bino aynan biz xohlagan bino ekanini his qildik. Otliq soqchilar paradi, Bukingem saroyiga kirish joyi qarshisida. Siz bundan yaxshiroq joy topa olmaysiz”, deydi CNN Travel'ga mehmonxona boshqaruvchi direktori Filipp Lebyof.
1906-yilda qurilgan bino sakkiz yillik rekonstruksiyadan o‘tdi, yuzlab ustalar binoning tarixiy elementlarini, jumladan, emandan ishlangan panellari va qo‘lda terilgan mozaikali polini tiklash uchun jalb qilindi.
Mehmonxonaning beshta tarixiy luks xonalari ikki yotoqxonali «Cherchill», avval armiya kengashi zali bo‘gan xonani va polshalik josus Kristina Granvil nomi bilan atalgan bir yotoqxonali « Grenvil”ni o‘z ichiga olgan.
Raffles o‘zining a’lo darajadagi xizmati bilan mashhur bo‘lib, yangi mehmonxona jamoasi ham brendning uzoq yillik obro‘siga mos kelish uchun bor kuchini sarflayotganini aytgan.
Buyuk Britaniyadagi ilk Raffles Trafalgar maydonidan parlament uylarigacha cho‘zilgan Uaytxollda joylashgan. Binoda uchta bar va to‘qqizta restoran mavjud.
Mehmonxonaning bayramlar, to‘ylar va turli tadbirlar uchun buyurtirish mumkin bo‘lgan ajoyib ziyofatlar zaliga allaqachon talab yuqori..
Uaytxoll hashamatli mehmonxonalardan ko‘ra, ko‘proq hukumat binolari bilan mashhur bo‘lsa-da, 2011-yilda Uaytxoll-pleysda besh yulduzli Corinthia Hotel London'ning ochilishi bu borada ba’zi o‘zgarishlarga olib keldi.
"O‘n yil oldin bu ko‘cha hukumat binolari joylashgan va ancha sokin hudud edi. Ammo fikrimcha, u oxirgi mahal ijobiy rivojlanmoqda”, deb ta’kidlab o‘tgan Lebyof va Londondagi birinchi Waldorf Astoria mehmonxonasi 2025-yilda Trafalgar maydoni yaqinida ochilishini qo‘shimcha qilgan.
