Gretsiyaning Tilos oroli dunyoda birinchi bo‘lib chiqindisiz joyga aylandi. Bunday ajoyib natijaga ham mahalliy hokimiyat, ham aholining ikki yillik sa’y-harakatlari evaziga erishildi.
Bor-yo‘g‘i 745 kishi yashaydigan orolda endi chiqindixonalar, axlat qutilari va polietilen paketlar yo‘q!
Buning barchasi 2021-yilda mahalliy hokimiyat Polygreen kompaniyasi bilan hamkorlikda Just Go Zero (Nol tomon olg‘a) deb nomlangan dasturni tatbiq qilganida boshlandi. Bu mahalliy aholiga saralash va qayta ishlash tizimi orqali deyarli barcha turdagi chiqindilarni utilizatsiya qilish imkonini beradi.
Shundan so‘ng aholiga chiqindilarni saralashning asosiy tamoyillari o‘rgatildi. Chiqindilarni saralash uchun barcha xonadon va korxonalarga QR kod bilan belgilangan maxsus qoplar berildi. So‘ngra chiqindining orolning biror yerida qolib ketmay, kerakli joyga yetib borishi uchun chiqindilarni uyma-uy yig‘ish tizimi joriy qilindi.
Natija haqiqatan ham hayratlanarli bo‘ldi. Hozirda oroldagi chiqindilarning 90 foizi qayta ishlanadi va kompostlanadi, barcha chiqindixonalar esa foydalanishdan chiqarilgan! Ikki yil ichida orolda aholi jon boshiga yillik chiqindilar hajmi deyarli ikki baravar kamaygan: 770 dan 440 kilogrammgacha.
Tilos meri Mariya Kammaning aytishicha, orol mislsiz yashil inqilobni amalga oshirdi.
