AQSHda uy 1 dollarlik ramziy narxda sotuvga qo‘yildi, deb xabar berdi NY Post nashri. 67 kvadrat metrlik uy Michigan shtatining Pontiak shahrida joylashgan. Uy 1956-yilda qurilgan va ko‘rinishicha, o‘shandan beri ta’mirlanmagan va jiddiy tiklanishni talab qiladi.
Uy bir qavatli, unda ikkita yotoqxona, oshxona va vannaxona bor, ammo mebelsiz va ta’mirtalab.
Sotuvchining ta’kidlashicha, uy tomi mustahkamligi "shubha uyg‘otadi", ammo yog‘ochdan ishlangan pollari saqlanib qolgan. Uy o‘t va buta bosgan kichik maydonda joylashgan.
Xaridorlarga binoni o‘zlari ta’mirlash taklif qilinmoqda. Sotuvchining tan olishicha, uyni ta’mirlash ko‘p vaqt talab etadi va dastlabki hisob-kitoblarga ko‘ra, buning uchun 30 ming dollardan 40 ming dollargacha sarflanadi.
“Uy ichiga kiring va sizning ijodiy yondashuvingizni talab qiladigan har bir burchakni kashf qilib, hayajonli his-tuyg‘ularni boshdan kechiring”, deb uyga hazil aralash ta’rif bergan riyeltor Kris Xyufel.
Uy 2022-yilda 4000 dollarga sotib olingan. Riyeltor e’lon qilingan narx albatta yakuniy bo‘lmasligiga va uy uchun kamida 45 ming dollar taklif qilinishiga umid qilmoqda.
