Dubayning yetakchi quruvchi kompaniyasi Emaar Properties 2016-yilda tomosha minorasi sifatida e’lon qilingan Dubai Creek Tower loyihasi hozirda qayta ishlanayotgani va 2024- yildan uni amalga oshirish bo‘yicha ishlar boshlanishini ma’lum qildi.
Emaar Properties asoschisi Muhammad Al-Abbarning aytishicha, qurib bitkazilgach, dunyoning amaldagi eng baland binosi Burj Halifadan balandroq bo‘ladigan inshoot loyihasini yetakchi xalqaro kompaniya modernizatsiya qilmoqda.
“Yaqin 7-8 oy ichida yangi loyiha g‘oyasini ishlab chiqish va bir yil ichida qurilishni boshlashni rejalashtirganmiz”, deb aytgan Al-Abbar.
Avvalroq Dubai Creek Tower dizayni nilufarguldan ilhomlanib ishlangani va minoraga o‘xshab ketishi xabar qilingandi. Binoning markaziy qismi cho‘zilgan oval shaklidagi "g‘uncha"dan iborat bo‘lib, uning tepasida dunyodagi eng baland tomosha maydonchalaridan biri joylashadi.
Balandligi kamida 1310 metr bo‘ladigan minora qurilishi tugagach, u bir nechta yirik rekord o‘rnatishi mumkin. Misol uchun, bunday rekordlardan biri 110 km uzunlikdagi, og‘irligi 18 000 tonnadan oshadigan kabellar qo‘llanishi bo‘ladi. Agar bu kabellar yer bo‘ylab cho‘zilsa, Dubaydan Abu-Dabigacha yetadi.
Minora poydevori jahon rekordini o‘rnatib bo‘ldi. U 60 metrdan ortiq chuqurlikda 145 tadan ko‘proq qoziq qoqish yordamida barpo etildi. Qoziqlarning umumiy uzunligi 9 km dan ortiqni tashkil qiladi.
Minoraning balandligi 80 qavatli binoga teng bo‘ladigan “g‘uncha”si 12 ming tonna po‘latdan, uning “bandi” esa 240 ming kub metr betondan quriladi.
Minora Dubay xalqaro aeroportidan atigi 10 daqiqalik masofada, Ras Al-Xor tabiat qo‘riqxonasi yaqinida joylashadi.
Avvalroq Dubai Creek Tower loyihasi Dubayga taxminan 1 milliard dollarga tushishi xabar qilingan. Minora haqiqatan ham juda yorqin ko‘rinishga ega bo‘ladi. Biroq, u qay tarzda ishlatilishiga kelsak, u turar-joy yoki ofis binosi bo‘lmaydi, undan muzey, dunyodagi eng baland tomosha maydonchasi va sayyohlik maskani sifatida foydalaniladi. Bino ichida nimalar bo‘lishiga quruvchilar hali aniq javob berishmagan.
