Binoni yuqoridan pastga qarab qurish, ya’ni binoning zaminini yerda yig‘ish va uni belgilangan joyiga ko‘tarish binoning temir karkaslari, pollari, devorlari va barcha komponentlarini balandda barpo etish kabi ko‘p mehnat talab qiladigan jarayonga muqobil bo‘la oladi.
Detroytning Grektaun tumanida 63 metrlik Exchange turar-joy binosi aynan shunday texnologiya yordamida qurilgan. Bino Ghafari Associates tomonidan loyihalangan.
Ushbu texnologiya LIFTbuild kompaniyasi tomonidan ishlab chiqilgan. Binoning har bir qavati yerda ikkita beton ustun atrofida yig‘iladi va keyin belgilangan joyiga ko‘tariladi. Texnologiya ish jarayoni xavfsizligini oshiradi, qurilish vaqtini qisqartiradi va birinchi qavat maydonidan doimiy foydalanish imkonini beradi.
Binoning asosiy devorlari qalinligi 25-30 sm bo‘lib, zinapoyalar va liftlarni o‘z ichiga oladi. Temir karkasli uyning har bir qavati yerda 75 tonnadan ortiq po‘lat va 100 kub metr beton yordamida quriladi.
Bir qavat ko‘tarilgach, yangi qavatda ishni xavfsiz boshlash mumkin. Qavatlar 200 tonnagacha yukni ko‘tara oladigan sakkizta po‘lat simli domkrat yordamida soatiga 6 metrdan 9 metrgacha tezlikda ko‘tariladi.
Binoning barcha elementlari birxillashtirilgan, har bir komponent tayyor bo‘lishi bilanoq o‘rnatiladi. Konturni namlikka chidamli pol bilan qoplashdan oldin, montaj brigadasi elektr va santexnika tizimini o‘rnatish uchun qavatni 20-26 metrga ko‘taradi. Har bir qavatni o‘rnatish 9-10 kun davom etadi.
Exchange binosini ushbu texnologiya yordamida qurish bir yildan sal ko‘proq vaqtni olgan, loyiha qiymati 64 million dollarni tashkil etgan.
