Sieger Suarez Architects va Dezer Development kompaniyalari Bentley avtomobilsozlik brendining Mayami-Bichda qad rostlaydigan 61 qavatli osmono‘par binosi tafsilotlarini e’lon qildi. Hayratlanarlisi, binoda aholiga o‘z kvartiralariga to‘g‘ridan-to‘g‘ri avtomobillarida kirish imkonini beruvchi lift mavjud.
Bentley Residences deb nom oladigan bino Sieger Suarez Architects (SSA), Bentley va Dezer Development birgalikda amalga oshirayotgan loyiha hisoblanadi.
SSA avtomobil lifti konsepsiyasini ishlab chiqqan va keyinchalik u Dezer Developments tomonidan “Dezervator” nomi bilan patentlangan.
228 metr balandlikdagi osmono‘par binoning har bir qavatida 3-4 mashina uchun garaj bo‘ladi. Ularga birinchi qavatdagi to‘rtta liftdan biri orqali ko‘tarilish mumkin bo‘ladi.
Ushbu lift uy aholisining avtomobillarini to‘g‘ridan-to‘g‘ri kvartira ichidagi garajlarga yetkazib beradi.
Pastki qavatlarda liftlar odamlar o‘zlarining avtomobillari oynalari orqali binoning umumiy hududlarini ko‘ra olishlari uchun oyna bilan qoplanadi.
Aholining avtotransportlari skanerlash tizimi yordamida ro‘yxatga olinadigan RFID stikerlari bilan jihozlanadi. So‘ngra tizim haydovchilarni bir qator chiroqlar yordamida ularni to‘g‘ridan-to‘g‘ri kvartiraga olib boruvchi kerakli liftga yo‘naltiradi.
Garajlar elektr transport vositalarini quvvatlash stansiyalari bilan bir qatorda buyumlarni saqlash uchun qo‘shimcha joylar bilan jihozlanadi. Liftlar qaysi chiqish kerak bo‘lsa, transport vositalarini shu tomonga aylantira oladi.
Hali poydevori qo‘yilmagan osmono‘par bino britaniyalik avtomobil ishlab chiqaruvchi kompaniyaning birinchi turar-joy loyihasi bo‘lib, u 2026-yilda qurib bitkazilishi rejalashtirilgan.
Binoning tuzilishi oval shaklda bo‘lib, ba’zi xonadonlar ham shunday shaklga ega bo‘ladi.
Ta’kidlanishicha, binoning balkonlari ham o‘ziga diqqatni tortadi. Ularning har biri xonadonlar maydonining yarmini egallaydi. Har bir terassada hovuz, ochiq havoda dush, oshxona va umumiy xona bo‘ladi.
SSA ayni vaqtda Mayamidagi boshqa yirik loyihalar, jumladan, qurilishi rejalashtirilgan Waldorf Astoria uchun javobgar hisoblanadi. Ushbu bino qurib bitkazilgandan so‘ng shaharning ilk o‘ta baland osmono‘par binosi bo‘ladi.
