Knight Frank ko‘chmas mulk agentligining so‘nggi tadqiqotiga ko‘ra, dunyoda 10 million dollardan boshlanuvchi hashamatli uylar savdosi 2023-yilning 1-choragida undan avvalgi chorakka nisbatan 11 foizga o‘sgan. 12 ta asosiy bozorda 417 ta bitim amalga oshirilgan. 2023-yilning 1-choragida hashamatli uylar dunyo bozorida Dubay yetakchi bo‘lgan – bu shaharda 88 ta sotuv amalga oshirilgan. Keyingi o‘rinlarni Gonkong (67 ta bitim), Nyu-York (58), Los-Anjeles (46), Singapur (37) va London (36) egallagan.
Shu bilan birga, joriy yil 1-choragida hashamatli uy-joylar global bozori hajmi 7,2 milliard dollarni tashkil etgan va avvalgi chorakka nisbatan 4 foizga kamaygan. Hashamatli uylarning eng yuqori o‘rtacha narxi Jenevada qayd qilingan - 23,8 million dollar.
“Iqtisodiy qiyinchiliklarga qaramay, hashamatli turar-joy ko‘chmas mulkiga dunyo bo‘ylab talab kuchli bo‘lib qolmoqda. Tadqiqot natijalari global inflyatsiya borasidagi kuchli mavhumlik mavjudligi va foiz stavkalarining oshishiga qaramay, hashamatli xaridlarni amalga oshirishga doimo intilish mavjudligini aks ettiradi”, deb aytgan Knight Frank Singapore ofisi rahbari Nikolas Keong.
Yillik hisobda Dubay 274 ta sotuv bilan hashamatli uy-joy bozorlari ro‘yxatida yetakchilik qilmoqda. Undan keyingi o‘rinlarni London (233 ta sotuv), Nyu-York (219), Los-Anjeles (210), Gonkong (166) va Singapur (125) egallamoqda.
Keongning ta’kidlashicha, hashamatli uylar bozori rivojlanmoqda va hozirda xaridorlar har qachongidan ko‘ra ko‘proq vaziyatdan xabardor, shu sababli sotuvchilar hatto bozorning yuqori qismida ham narxni real qiymatda belgilashlari kerak. “Biz 2023-yilda sharoitlar savdolar cho‘qqiga chiqqan 2021-yilga nisbatan bosiqroq bo‘lishini kutmoqdamiz. Bunda umumiy savdolar hajmi butun yil uchun 25-27 milliard dollarni tashkil qilishi mumkin. Biroq, joriy yil oxirida jahon iqtisodiyoti o‘sishining tiklanishi 2024-yilda tuziladigan bitimlarga yordam beradi va savdo hajmi 30 milliard dollardan ortadi”, deb qo‘shimcha qilgan mutaxassis.
