Ko‘chmas mulk bo‘yicha konsalting kompaniyasi Knight Frank'ning yangi ma’lumotlariga ko‘ra, 2023-yilda o‘sib borayotgan inflyatsiya va ipoteka kreditlari bo‘yicha stavkalarning muntazam ko‘tarilishi dunyo bo‘ylab ko‘plab yirik ko‘chmas mulk bozorlarini sekinlashtirib qo‘ydi.
Knight Frank eng yaxshi shaharlar ko‘chmas mulk bozorlarini oxirgi marta 2022-yil dekabrida tahlil qilgan edi. Ta’kidlanishicha, o‘shandan beri ko‘p narsa o‘zgargan.
Kuzatib boriladigan 26 shahardan Dubay 2023 yilgi uy-joy narxlari o‘sish reytingida hamon yetakchi bo‘lib qolmoqda, biroq ushbu shaharda uy-joy narxlarining yillik o‘sishi o‘tgan yilgi 44 foizdan farqli o‘laroq, joriy yilda 14 foizgacha pasayishi kutilmoqda.
Tokio, Parij, Madrid va Mayami uy-joy bozorida narxlar 4 foizga o‘sishi prognoz qilinmoqda. Ushbu shaharlar bu ko‘rsatkich bilan reytingning yetakchi beshligidan joy olgan.
Tahlil qilingan 26 shahardan 6 ta shahar 6 oy oldin prognoz qilingandan yaxshiroq natijalar ko‘rsatishi kutilmoqda, 9 tasi o‘zgarishsiz qoladi, qolgan o‘n bittasida esa sustroq o‘sish kuzatilishi taxmin qilinmoqda.
Shaharlar ichida Jeneva va Vankuver uchun prognozlar foiz jihatdan eng yaxshilangan, Berlin, Edinburg, Dublin, Los-Anjeles, Syurix va Lissabon uchun esa, aksincha, eng yomonlashgan.
2024-yilda, Dubaydan tashqari, reytingga kiruvchi qolgan shaharlarda asosiy narxlar o‘rtacha 2 foizga yaxshilanishi prognoz qilinmoqda.
2022-yilda BAA hukumati tomonidan qabul qilingan tashabbuslar Dubayda ko‘chmas mulk savdosining o‘sishiga ko‘mak berdi, o‘sish 2021-yilga nisbatan 76,5 foizni tashkil etgan. Dubai Media Office ma’lumotlariga ko‘ra, bitimlar qiymati 528 milliard dirhamga (143,7 milliard AQSH dollari), soni esa 122 658 taga yetgan, bu esa 2021-yilga nisbatan 44,7 foizga ko‘proqdir.
Asosiy tashabbuslardan biri 2022-yil 3-oktabrda viza qoidalariga kiritilgan o‘zgarish bo‘ldi. Endilikda BAAning 10 yillik “Oltin vizasi”ga ega bo‘lish uchun kamida 2 million dirhamlik (545000 AQSH dollari) ko‘chmas mulk sotib olish talab etiladi. Ilgari bu qiymat 10 million dirhamga (2,7 million dollar) yetgan.
