Numbeo servisining jinoyatchilik indeksiga ko‘ra, Yevropaning eng xavfli o‘nta shaharlari ma’lum qilindi. Indeks so‘nggi 3 yil davomida servis saytiga tashrif buyuruvchilardan olingan ma’lumotlarga asoslangan. Qizig‘i shundaki, Yevropadagi eng xavfli shaharlardan 4 tasi Fransiyada joylashgan. Quyida ushbu shaharlar keltirilgan.
1. Marsel, Fransiya
Marsel nafaqat Fransiyaning ikkinchi yirik shahri, balki mamlakatning eng qadimgi shahri hamdir – u 2600 yildan ko‘proq tarixga ega. Bundan tashqari, Marsel Fransiyaning yirik port shahri hisoblanadi. Uning aholisi 850 ming kishidan oshadi.
2. Kataniya, Italiya
Kataniya Sitsiliyaning Palermodan keyin ikkinchi yirik shahri. U Sitsiliyaning sharqiy sohilida, dunyodagi eng faol vulqonlardan biri bo‘lgan Etna etagida joylashgan. Aytish joiz, Kataniya YUNESKOning Butunjahon merosi ro‘yxatiga kiritilgan.
3. Birmingem, Buyuk Britaniya
Birmingem Buyuk Britaniyaning Londondan keyin ikkinchi yirik shahri hisoblanib, bir vaqtlar sanoat inqilobi markazi bo‘lgan. Bu shaharda 100 dan ortiq mamlakatdan kelgan 1 milliondan ko’proq odam yashaydi. Birmingem jinoyatchilik darajasi yuqori bo‘lishiga qaramay, mashhur sayyohlik maskani hisoblanadi va o‘zining yorqin madaniyati hamda tungi hayoti bilan mashhur.
4. Koventri, Buyuk Britaniya
Koventri — Angliyaning markaziy qismidagi shahar. Uning aholisi 340 ming kishidan oshadi. Koventri avtomobil sanoati bilan mashhur.
5. Sharlerua, Belgiya
Sharlerua Belgiyaning janubida joylashgan Valloniya regionidagi eng yirik shahardir. Bryusseldan 50 km janubda joylashgan. Sharlerua aholisi 200 ming kishidan oshadi. Shahar sport ishqibozlari orasida mashhur bo‘lib, u yerda Charleroi Sporting futbol klubi va Charleroi Wolves xokkey jamoasi bor.
6. Neapol, Italiya
Neapol Italiyaning Rim va Milandan keyin uchinchi yirik shahri hamda Tirren dengizi sohilbo‘yida joylashgan Kampaniya viloyatining poytaxti hisoblanadi. Neapol aholisi 1 million kishidan oshadi. Shahar o‘zining pitssasi, tarixiy markazi va Vezuviy vulqoniga yaqinligi bilan mashhur.
7. Monpelye, Fransiya
Monpelye - Fransiya janubidagi Ero departamentining poytaxti. O‘rtayer dengizi sohilidan 12 km uzoqlikda joylashgan. Shaharning tarixiy markazi YUNESKOning Butunjahon merosi ro‘yxatiga kiritilgan hamda tor ko‘chalari va o‘rta asrlarga mansub binolari bilan mashhur.
8. Lyej, Belgiya
Lyej – Belgiyaning Valloniyadagi Lyej provinsiyasi poytaxti. U Bryusseldan 90 km sharqda, Maas daryosi bo‘yida joylashgan. Aholisi 200 mingga yaqin. Lyejda bir qator universitetlar, jumladan, Belgiyaning eng qadimgi universitetlaridan biri bo‘lgan Lyej universiteti joylashgan.
9. Grenobl, Fransiya
Grenobl — Fransiya janubi-sharqidagi Overn-Rona-Alpes regionining poytaxti. Alp tog‘lari etagida, Drak va Izer daryolari oralig‘ida joylashgan. Grenobl aholisi taxminan 160000 kishini tashkil qiladi. O‘rta asrlarda shahar to‘qimachilik sanoatining muhim markazlaridan bo‘lgan.
10. Nant, Fransiya
Nant Fransiyaning 300000 dan ortiq aholiga ega bo‘lgan oltinchi yirik shahridir. U Luara daryosi bo‘yida, Pei-de-la-Luar regionida joylashgan.
Servis ma’lumotlariga ko‘ra, Yevropaning eng xavfsiz shahri Shveysariyaning Bern shahri bo‘ldi. Undan keyingi o‘rinlarni Niderlandiyaning Gaaga, Norvegiyaning Tronxeym va Germaniyaning Myunxen shaharlari egallagan.
