2 aprel kuni Parij meriyasi shahardagi elektr samokatlar taqdirini hal qilish bo‘yicha referendum o‘tkazgandi. Uning natijalariga ko‘ra, ishtirokchilarning aksariyati samokatlarning taqiqlanishi uchun ovoz bergan.
Bunday qaror elektr samokatlar ishtirokida baxtsiz hodisalarning tobora ko‘payayotgani sababli qabul qilingan: 2022-yilning birinchi yarmida 330 ta shunday baxtsiz hodisa qayd etilgan, bu 2021-yilning shu davriga nisbatan 37 foizga ko‘proqni tashkil qilgan.
Referendumda qatnashgan 103 ming kishining 89 foizi Fransiya poytaxtida elektr samokatlar taqiqlanishi uchun ovoz bergan.
Parij meri Ann Idalgo yangi qonun 1-sentabrdan kuchga kirishini ma’lum qildi.
Parij meriyasi shartnoma tuzgan uchta asosiy xususiy kompaniya Lime, Tier va Dott 31-avgustga qadar o‘z samokatlarini shahar ko‘chalaridan olib tashlashi kerak bo‘ladi.
O‘z navbatida, kompaniyalar referendum natijalaridan norozi ekani va qaror yuzasidan sudga arz qilmoqchiligini ma’lum qilgan. Ularning fikricha, referendumdagi ishtirok yetarlicha bo‘lmagan va bor-yo‘g‘i 7,46 foizni tashkil qilgan.
Parij elektr samokatlar harakati cheklangan yoki taqiqlangan yagona shahar emas. Misol uchun, Lissabonda elektr samokatda 20 km/soatdan ortiq tezlashib bo‘lmaydi, Lyublyanada esa ularning tezligi 5 km/soat bilan cheklangan. Varshavada istirohat bog‘lariga elektr samokatlarda kirish taqiqlangan bo‘lsa, Italiyada esa hattoki ularda uchish bo‘yicha kurslarni bitirish talab etiladi.
