AQSHning Florida shtatida yashovchi fuqaro Mega Millions lotereyasida 1,58 milliard dollarlik yutuqni qo‘lga kiritdi.
Bu Mega Millions tarixida rekord yutuq hisoblanadi. Baxtli chipta Florida shtatining Neptun-Bich shahridagi Publix supermarketidan xarid qilingan. Ushbu jekpot uchun yutuq raqamlari 13, 19, 20, 32, 33 va 14 dan iborat bo‘lgan.
![]()
G‘olibning ismi hozircha e’lon qilinmagan.
Mega Millions ma’lumotlariga ko‘ra, g‘olib mukofot pulining hammasini 29 yil davomida bo‘lib-bo‘lib yoki birdaniga 783 million dollar miqdorida olishi mumkin.
Lotereyaning rekord summasi g‘olib yo‘qligi sababli deyarli to‘rt oy davomida o‘sib borgan. Bundan oldingi yutuq 18-aprel kuni Nyu-Yorkda qayd qilingan. Endi lotereyaning navbatdagi o‘yini 20 million dollardan boshlanadi.
Ushbu yutuq AQSH lotereyalari tarixidagi uchinchi yirik yutuqdir.
2023-yil fevral oyida Los-Anjeles yaqinidagi yoqilg‘i quyish shoxobchasida sotilgan chipta o‘z egasiga AQSH tarixidagi rekord yutuqni olib kelgan. Omadi chopgan g‘olib Powerball lotereyasida 2,04 milliard dollarlik jekpotni qo‘lga kiritgan.
2016-yil yanvar oyida Kaliforniya, Florida va Tennessi shtatlarida 1,586 milliard dollarlik yutuqli chiptalar sotib olingan.
Mega Millions’ning rekord qiymatdagi jekpoti joriy yozda yutib olingan bir milliard dollardan kattaroq ikkinchi yutuq bo‘ldi. Iyul oyida Los-Anjelesda Powerball lotereyasida sotilgan yutuqli chipta o‘z egasiga 1,08 milliard dollar keltirgan.
Ta’kidlanishicha, Mega Millions jekpotini yutib olish ehtimoli taxminan 302,58 milliontadan bittani tashkil qiladi.
