Indiana Jons haqidagi filmlarning bosh qahramoni ilonlarni yoqtirmasligi bilan mashhur edi. Ammo ekranda uning qiyofasini gavdalantirgan amerikalik aktyor Xarrison Ford sharafiga yangi turdagi ilon nomlandi.
2002-yilda Germaniya, AQSH va Peru tadqiqotchilari Perudagi And tog‘larida fanga noma’lum ilonni aniqlashgan. Ilon Otishi milliy bog‘i hududida quyoshda toblanayotganda topilgan.
Uning uzunligi ilonlar uchun juda “kamtarona” bo‘lib chiqdi – bor-yo‘g‘i 40,6 sm. Aniqlanishicha, sudraluvchi odamlar uchun xavfli emas.
Yaqinda Germaniya gerpetologiya jamiyati (DGHT) Gollivud aktyorining atrof-muhit muhofazasiga qo‘shgan hissasini e’tirof etib, ilonni uni nomi bilan Tachymenoides harrisonfordi deb atadi.
"Olimlar bolalar qo‘rqadigan jonzotlarga muntazam mening ismimni qo‘yishadi, - deb hazil bilan izoh bergan aktyorning o‘zi bu yangilikka. – Buning sababini hech tushunolmayman. Axir bo‘sh vaqtimda kashta tiksam, o‘zim o‘stiradigan rayhonga tunlari qo‘rqmasin deb allalar aytsam".
Ford 1993-yilda o‘rgimchakning yangi turi ham uning nomi bilan Calponia harrisonfordi deb atalganini nazarda tutgan.
Shu bilan birga, 81 yoshli aktyor ushbu e’tirof uchun tadqiqotchilarga minnatdorchilik bildirgan: "Jiddiy aytadigan bo‘lsak, bu kashfiyot kamtarlikka o‘rgatadi. Bu bizning dunyoda hali ko‘p noma’lum narsalar borligini va odamlar ulkan biosferaning kichik bir qismi ekanligini eslatib turadi".
"Bu sayyorada barcha taqdirlar chambarchas bog‘lanib ketgan va bugungi kunda millionlab turlar yo‘q bo‘lib ketish arafasida. Biz tabiat bilan munosabatlarimizni yaxshilashimiz va hayot mavj urayotgan har bir burchakni himoyalamog‘imiz lozim", deya qo‘shimcha qilgan Ford.
