Yaqinda o‘tkazilgan tadqiqotlardan biri odam kuniga qancha ko‘p qadam tashlasa, shunchalik uzoq umr ko‘rishini yana bir bor isbotladi. Polshalik olimlar turli kasalliklardan o‘lim xavfini kamaytirish uchun kuniga qancha qadam yurish kerakligini aniqladilar.
Harakat - bu hayot demakdir. Sog‘lom bo‘lish uchun doimiy ravishda sport zalida terlashning hojati yo‘q, buning uchun har kuni piyoda yurish kifoya qiladi. Biroq sog‘liq uchun qancha qadam yurish haqiqatan foydali ekani borasidagi savol uzoq vaqt ochiq qolayotgandi. Ko‘pchilikning ta’kidlashicha, me’yor bo‘yicha har kuni 10 ming qadam yurish kerak, biroq bu unday emas ekan.
Polshaning Lodz tibbiyot universiteti kardiologlari piyoda yurishning inson salomatligiga ta’siri bo‘yicha 300 ming kishini qamrab olgan 17 ta yirik tadqiqotni tahlil qilishdi va ularga ko‘ra muhim xulosalar chiqarishdi.
Turli sondagi qadamlarning sog‘liqqa ta’sirini bilish uchun odamlar ortidan o‘rtacha 7 yil kuzatuv olib borilgan, deb yozmoqda Guardian nashri.
Olimlar tahlillari shuni ko‘rsatdiki, kuniga atigi 4000 qadam yurish har qanday kasallikdan o‘lish xavfini kamaytirishi mumkin, ammo bu ko‘rsatkich qanchalik yuqori bo‘lsa, sog‘liq uchun shunchalik foyda ko‘p bo‘ladi.
Kuniga yurilgan har qo‘shimcha 500 qadam yurak-qon tomiri kasalligidan o‘lish xavfini 7 foizga, har qo‘shimcha 1000 qadam esa 15 foizga kamaytirar ekan.
O‘tgan asrning 60-yillarida turli davlatlar do‘konlarida Manpo-kei deb nomlangan qadam o‘lchagich paydo bo‘lgan, bu nom yapon tilidan "10 ming metr" deb tarjima qilinadi. Bu o‘ziga xos marketing hiylasi bo‘lgan hamda odamlar ongiga sog‘lom bo‘lish uchun kuniga 10 ming metr yurish kerakligi haqidagi tushunchani singdirgan. Ushbu trend bizning kunlargacha yetib kelgan.
Olimlar, kuniga 10 ming qadam tashlash yuraq-qon tomiri tizimini, ruhiy holatni yaxshilashini va qand kasalligi xavfini kamaytirishini aniqlashgan. Biroq boshqa bir qancha tadqiqotlar (jumladan, polshaliklar o‘tkazgan) bu raqamlar ancha oshirib yuborilganini va sog‘lom bo‘lish uchun bunchalik ko‘p yurish shartmasligini ko‘rsatdi.
Ta’kidlanishicha, yaqinda Texas universitetida o‘tkazilgan tadqiqot ham kuniga 5000 tadan kamroq qadam tashlasangiz, tanangiz yog‘ni kamroq o‘zlashtirishini isbotladi. Yog‘ning organizmda to‘planishi esa yurak-qon tomir kasalliklari va qand kasalligi rivojlanishi ehtimolini oshirishi mumkin.
